Vielha, 14 de noveme de 2017.- Mès de 250 persones participèren eth darrèr dissabte pendent tot eth dia ena Maraton de donacion de sang en Palai d’Espòrts de Vielha, organizat pera Associacion de Donants de Sang dera Val d’Aran.

En totau s’artenheren 211 donacions que 14 ne sigueren de plasma ath delà d’uns 40 aufriments.

Per prumèr còp se hec donacion de plasma ena Val d’Aran. Coma ère eth prumèr còp, des deth Banc de Sang e Teishuts se coordinèren es donacions en tot avertir as donants, e se prenec es donades des persones interessades en dar plasma en pròplèus ocasions.

Dar plasma ei coma donar sang, n’i a pro damb un shinhau mès de temps, ath torn de 45 menutes. Eth plasma ei eth qu’interven ena coagulacion dera sang, e se pòt dar cada 15 dies.

Des dera Associacion de Donants de Sang dera Val d’Aran vòlen arregraïr publicaments era participacion de toti e era collaboracion des institucions, Conselh Generau d’Aran, Ajuntament de Vielha e Mijaran, Ajuntament de Naut Aran, Departament de salut dera Generalitat e Banc de Teishuts, atau coma as associacions e particulares qu’un an mès ac an hèt possible.