Vielha, 4 de gèr de 2018.- Manque un mes just entara 39au edicion dera Marxa Beret qu’enguan se celebrarà es dies 3 e 4 de hereuèr. Era Marxa Beret ei era pròva populara per excelléncia der esquí de hons e ua des pròves mès assolidades que se realizen.
Era 39au edicion dera Marxa Beret tornarà a compdar enguan damb participaires procedenti de tota Euròpa. Es inscripcions entara pròva van damb bon ritme e ja compden damb era participacion de cent esquiaires noruècs e vint-e-cinc italians entre es inscrits internacionaus. Çò que hè a preveir qu’un an mès s’artenherà era chifra de mès de 1.000 inscripcions.
Era Marxa Beret 2018 vò mantier eth sòn caractèr popular e convertir-se un an mès en un grana hèsta der esquí nordic. Per açò, es organizadors, eth Conselh Generau d’Aran, Baqueira Beret e er Ajuntament de Naut Aran, prepausen tota ua sèria d’eveniments paralleli ara Marxa Beret. Entre eri, era espectaculara corsa Sprint Salomon que se disputarà eth dia 3 de hereuèr, damb er objectiu que toti es participaires e seguidors dera 39au Marxa Beret gaudisquen d’ua dimenjada agradable ena Val d’Aran.
Eth dimenge 4 de hereuèr se disputarà en Pla de Beret era Marxa Beret a compdar des 10.00 ores, damb es traçats de 42, 21 e 10 quilomètres.
Era pròva seguís laguens deth Circuit de Corses Populares d’esquí de hons (categoria ML) dera Federacion Internacionau d’Esquí (FIS) e dempús der an passat ei part deth calendari dera Copa Espanha dera Reiau Federacion Espanhòla d’Espòrts d’Iuèrn (RFEDI).
Es inscripcions les cau realizar per Internet, a trauès dera pagina web dera Marxa Beret, www.marxaberet.com . Cau destacar que toti aqueri que s’inscriuen abantes deth 15 de gèr de 2018 gaudiràn d’ua tarifa mès redusida. Es inscripcions presenciaus debanaràn ena Casa d’Acuelhuda en Salardú.
Programa 39au Marxa Beret
Dissabte, 3 de hereuèr
09:30 – Dubertura dera “Casa d’Acuelhuda”
16:00 – Exibicion «Sprint Salomon»
19:00 – Repartiment de prèmis
19:30 – Presentacion dera «39au Marxa Beret»
20:30 – Barrament d’inscripcions ena Casa d’Acuelhuda
Diumenge, 4 de hereuèr
10:00 – Gessuda dera 39au Marxa Beret
13:30 – Repartiment de prèmis
14:00 – Ceremònia de clausura
15:00 – Barrament deth circuit
Tota era informacion en: www.marxaberet.com