Vielha, 15 de gener de 2018.- Un an mès 180 escolans de tresau e quatau de primària des escòles dera Val d’Aran: 120 dera Escòla Garona de Vielha, 30 dera Escòla Sant Roc de Bossòst e dera Escòla Estudi Alejandro Casona de Les, e 30 dera Escòla ZER Val d’Aran (Naut Aran), participen a compdar de deman en programa Espòrt Blanc Escolar, un programa organizat peth Conselh Catalan der Espòrt e eth Departament d’Ensenhament dera Generalitat, en que i collabòren era FCEH, era Deputacion de Lhèida, Baqueira Beret, eth Conselh Generau d’Aran e eth Conselh Esportiu dera Val d’Aran.
Eth programa Espòrt Blanc Escolar, enquadrat en Plan Estrategic d’Espòrts d’Iuèrn de Catalonha, a er objectiu d’impulsar era iniciacion e era coneishença des espòrts d’iuèrn entre es mès petiti enes sues diferentes modalitats. Es escolans auràn er esquí coma ua matèria mès a estudiar laguens dera matèria d’Educacion Fisica. Ei obligatòria, donques serà era nòta dera matèria d’Educacion Fisica deth dusau trimèstre.
Es escolars realizaràn un totau de ueit sessions laguens der orari lectiu ena estacion d’esquí de Baqueira Beret, a on apreneràn es nocions basiques des tres modalitats d’esquí mès abituau, esquí nordic, aupin e snowboard, maugrat que tanben poderàn perfeccionar se ja ne saben. Eth programa includís tres jornades d’esquí de hons, dues d’esquí aupin, dues de snowboard e ua de freeride.
Eth programa comence damb er esqui nordic es dimars dera Zer Val d’Aran, dimèrcles escolans de 3au dera Escòla Garona, dijaus escolans de 4au dera Escòla Garona e diuendres escolans des escòles Sant Roc e Alejandro Casona.
Eth vicesindic d’Aran e conselhèr d’Espòrts, Luís Carlos Medina, a explicat qu’eth programa Espòrt Blanc Escolar permet difóner e promòir era practica des espòrts d’iuèrn e ath còp era cultura e es valors dera nhèu e dera montanha, qu’en cas dera Val d’Aran supausen un mejan de vida e de gessudes esportiues e professionaus entàs persones.
Eth programa ei finançat peth Conselh catalan der Espòrt, e en cas dera Val d’Aran, ei eth Conselh Esportiu qui s’encargue dera coordinacion. Ena demarcacion de Lhèida participen en aguest cors uns 900 escolans de 3au e 4au de Primària de 18 escòles dera Val d’Aran, era Nauta Ribagòrça, eth Palhars Sobirà, eth Palhars Jussà, er Alt Urgell e eth Solsonès.