Vielha, 19 de gèr de 2018.- Er IEA-Acadèmia aranesa dera lengua occitana publique quate naues òbres entad aguest 2018 qu’ager sigueren presentades oficiauments en Conselh Generau d’Aran.

Se tracte d’eth “Vocabulari basic der aranés”, eth “Vocabulari dera tecnología dera informacion”, e de dues òbres qu’apartien ara naua colleccion Modèls de Lengua: “Sang Nòble e Sang deth Pòble”, de Jusèp Condò; e “Eth mercadèr de Venècia”, de William Shakespeare, arrevirada per Antoni Nogués.

Pendent era presentacion eth sindic d’Aran, Carlos Barrera, destaquèc eth prètzhèt dera Academia aranesa dera lengua occitana ara ora de trabalhar pera lengua, pr’amor qu’eth motiu d’èster d’un país coma eth nòste, didec, son era cultura, era lengua e era identitat aranesa.

Eth president der IEA-Academia aranesa dera lengua occitana, Jusèp Loís Sans, que siguec acompanhat per Rosa María Salgueiro, secretaria der IEA-AALO, e per Jèp de Montoya, president dera seccion aranesa der Institut, destaquèc qu’aguesti trabalhs son es quaus s’an elaborat pendent er an 2017, qu’i a agut fòrça trabalh e fòrça discussion sustot ara ora d’elaborar es dus diccionaris presentadi.

Sans expliquèc qu’era naua colleccion Modèls de Lengua, nèish damb era volontat de crear modèls de tèxtes, pr’amor qu’ua lengua petita coma er aranés a de reprodusir diuèrsi modèls de lengua.

Eth president dera Academia, hec referéncia a qu’era publicacion des dus vocabularis de nòrma aranesa, arrespon ath compromís der IEA-AALO e eth Conselh Generau d’Aran d’elaborar eth diccionari escolar dera lengua, que seguraments serà finalizat en dus ans, e qu’aguestes dues òbres son un auanç deth madeish. Eth Vocabulari basic a 2.500 entrades, e 1.000 en cas deth Vocabulari dera tecnologia dera informacion, qu’es membres dera Academia les a calgut estudiar, soscar, documentar-se e discutir fòrça, pr’amor qu’eth trabalh dera Academia ei eth de hèr de notari dera lengua. Entà Sans, aguestes dues òbres representen era elaboracion deth conjunt lexicau mès important qu’existís actuauments en aranés.

Coma novetat Jusèp Loís Sans, auancèc qu’actuauments des dera Academia se trabalhe en un Vocabulari basic dera nhèu, qu’aubedís ath hèt qu’era Val d’Aran ei un país de nhèu.