Vielha, 1 de març de 2018.- Era Agéncia de Residus de Catalonha organizèc en Girona, era setmana deth 21 ath 23 de hereuèr de 2018, eth II Forum Internacionau de residus “Waste in progress”, ath que assistiren representants deth Conselh Generau d’Aran, deth Grèmi d’Ostalaria dera Val d’Aran, e dera entrepresa concessionària deth servici de recuelhuda de residus ena Vau d’Aran, Romero Polo, SAU.

Eth congrès presentèc diuèrses experiéncies de zònes damb gran afluéncia temporau de toristes, e donques, notables floctuacions en besonh de gerir es residus locaus. E qu’a dia d’aué artenh arrecuélher de manèra separada mès deth 60% des sòns residus. Aguesta premissa ei era qu’exigirà Euròpa a toti es estadi membres er an 2020.

Quauqui uns des modèls que s’expliquèren son fòrça similars ath territòri aranés, coma Andòrra, es Dolomitas italians o eth Conselh Comarcau deth Palhars Sobeiran.

Experiéncies a on era collaboracion entre es diferenti agents implicadi, usatgèrs particulars, grani productors, operators responsables d’execucion deth servici e era administracion responsabla an artenhut resultats notables ena recuelhuda selectiua. Açò permet as territòris implicadi distinguir-se coma zònes actives en çò qu’ei eth suenh peth miei ambient, hèt que se percep coma ua valor que creish ara ora d’avalorar es aufèrtes des diferenti destins toristics.

Maugrat era dificultat que represente auer d’èster premanidi entà absorbir tota era produccion enes epòques de maximala afluéncia de visitants, bèri d’aguesti territòris an artenhut percentatges de recuelhuda selectiua des residus municipaus notables e significatius.

Eth conselhèr de Territòri d’Aran, José Antonio Boya, destaquèc qu’es modèls presentadi poderàn servir de guida entà sométer accions de futur immediat e atau regular e melhorar es zònes mès conflictiues dera Val d’Aran enes sasons nautes tant d’estiu coma d’iuèrn. Son projèctes pes qu’era Agéncia de Residus anoncièc qu’en brèu gesseràn importantes linhes d’ajuda, tostemp que representen implantar sistèmes de recuelhuda mès sostenible e justi tas productors implicadi ena participacion dera recuelhuda selectiua des residus generadi.

Boya declarèc qu’ei important destacar er interès deth sector privat, representat peth Grèmi d’Ostalaria dera Val d’Aran, entà participar en congrès e conéisher naui sistèmes de succès que ja foncionen en d’autes zònes, e que pòden significar mès valor entàs sues activitats un còp implantat en nòste territòri.