Vielha, 2 de març de 2018.- Eth secretari d’Ahèrs Sociaus e Familhes dera Generalitat, Francesc Iglesias, a mantengut ua reünion de trabalh damb eth sindic d’Aran, Carlos Barrera, entà tractar sus era naua residéncia geriatrica San Joan de Les.

Eth secretari d’Ahèrs Sociaus e Familhes s’a desplaçat enquiara Val d’Aran acompanhat dera equipa tecnica deth departament entà conéisher de prumèra de man eth projècte dera naua residéncia geriatrica dera Val d’Aran, qu’ei previst qu’entre en foncionament er an 2019.

Era amassada tanben a servit entà meter en comuna eth trabalh de collaboracion entre eth departament de Trabalh, Ahèrs Sociaus e Familhes dera Generalitat e eth Conselh Generau d’Aran, en çò que tanh as politiques dirigides as persones granes.

En aguest sens, Francesc Iglesias, a auançat qu’era Val d’Aran serà eth prumèr territòri de Catalonha a on eth departament de Trabalh, Ahèrs Sociaus e Familhes dera Generalitat e eth Conselh Generau, meteràn en practica eth nau Plan integrau d’atencion domiciliària entara gent grana. Un plan que coordinarà es recorsi entre es servicis de Salut e es d’Ahèrs Sociaus entà ua melhor atencion domiciliària as persones granes. Iglesias ahigec qu’aguest ei eth camin que se seguís en entorn de païsi europèus, qu’ath delà a de perméter que se trabalhe damb vocacion comunitària.

Pera sua part eth sindic d’Aran, qualifiquèc de fòrça importanta aguesta naua vision des servicis sociaus e dera atencion as persones granes, pr’amor que didec, ena Val d’Aran sabem qu’era gent grana a eth desir de contunhar en tot víuer enes sues cases, mès damb ua bona atencion sòci-sanitari.

En çò que tanh ara residéncia geriatrica San Joan de Les, eth sindic d’Aran a explicat qu’aguest nau equipament dera Val d’Aran, aufrirà 50% de places publiques e er aute 50% seràn privades, çò qu’ajudarà a redusir era lista de demora existenta, e que comportarà bastir totauments ua naua estructura intèrna ena bastissa de Les.

Eth bastiment dera naua residéncia, que finançarà ena sua totalitat eth Conselh Generau d’Aran, a un pressupòst de 2.490.000€. Era prevision segontes a manifestat eth sindic ei qu’eth pròplèu deluns eth Conselh de Govèrn d’Aran, aprovarà eth concors entà adjudicar eth bastiment dera residéncia. Ues òbres qu’an de començar enguan entà qu’eth nau equipament sigue en foncionament er an 2019.

Eth síndic d’Aran, a ahijut qu’era entrada en foncionament dera residéncia geriatrica San Joan de Les, que compdarà damb 65 naues places, comportarà ath delà era creacion de naui lòcs de trabalh e era contractacion de naui professionaus en àmbit sociosanitari aranés.