Vielha, 5 de març de 2018.- Eth Govèrn d’Aran a aprovat aué, un còp finalizat eth periòde d’informacion publica, era licitacion des òbres d’execucion dera naua residéncia geriatrica deth Baish Aran damb un pressupòst de 2.499.988,08€.

Ena reünion deth Conselh de Govèrn tanben a aprovat eth nòm qu’amiarà aguest nau equipament que passarà a dider-se Residéncia Sant Joan de Les, entà seguir ena linha dera actuau Residéncia Sant Antòni de Vielha.

Eth sindic d’Aran, Carlos Barrera, a manifestat qu’era naua residéncia resolverà eth problèma estructurau e de servicis mès grèu que sofrís era Val d’Aran en aguest moment, pr’amor que permeterà acabar damb era lista de demora actuau de 44 persones ath delà de solucionar era situacion des aranesi qu’actuauments se tròben enes residéncies de Pont de Suert e d’Esterri. Eth sindic ahigec qu’actuauments era capacitat de responsa d’aguest servici en Aran, ei incorporar as naui usatgèrs en moment en que se produsís ua vacanta.

Per d’auta part eth sindic d’Aran, a destacat que damb era residéncia geriatrica Sant Joan de Les, s’artenh un objectiu de reequilibri territoriau en tot crear servicis ath long deth territòri, pr’amor qu’en aguest cas se garantirà eth ligam sociau e familhau des residents damb eth sòn vesiatge e d’autra banda se poderà hèr tornar entara Val d’Aran ad aqueri vesins que per fauta de plaça s’an vist obligadi a èster atengudi enes comarques vesines, damb era conseqüent dificultat sustot en iuèrn enes desplaçaments des familhaus e damb era totau desvinculacion damb amics e vesins.

Cap arrebrembar qu’eth darrèr diuendres 2 de març, auec lòc en Conselh Generau d’Aran ua reünion tecnica damb eth secretari d’Ahèrs Sociaus e Familhes dera Generalitat, Francisco Iglesias, e que posterioraments es tecnics deth departament de Trabalh, Ahèrs Sociaus e Familhes e deth Conselh Generau, realizèren ua visita ena bastissa qu’acuelherà era residéncia, entà contrastar eth projècte damb era realitat des espacis previsti der equipament.

Carlos Barrera, expliquèc tanben, segontes era execucion des òbres, ei previst qu’aguestes finalizen pendent eth mes de deseme d’enguan 2018, e que simultanèaments eth Conselh Generau d’Aran, premanirà es concorsi entad aquesiment de mobiliari e era gestion dera naua residéncia que serà en regim de consòrci. Açò permeterà que persones sense avaloracion de dependéncia poguen accedir a aucupar es places privades.

Era residéncia Sant Joan de Les compdarà damb un minim de 60 places que 30 places ne seràn de residéncia assistida publica e 30 privades, ath delà de 20 places mès de residéncia de dia.