Vielha, 13 de març de 2018.- Es autoritats franceses dera Sous-Préfecture de Saint Gaudens an comunicat ath Conselh Generau d’Aran era redubertura deth tram francés dera N-230 (N-125), ath sòn pas per Saint Béat a compdar de deman dia 14 de març.

Era carretèra RD44 (N-125) ath sòn pas per Saint Béat ère barrada ath trafic de toti es veïculs e persones, en ambdues direccions de trafic, des deth passat 13 de deseme, a causa deth risc d’esvauçament de pèires.

Ua enterpresa especializada, jos era supervision deth Servici de Restauracion de Tèrres de Montanha, amièc a tèrme ua intervencion destinada a assolidar es ròques perilhoses que dominen era carretèra.

Era redubertura dera rota ath trafic ei prevista entath 14 de març de 2018, dempús dera neteja deth lòc e dera carretèra e era eliminacion des senhaus restacades damb es desviacions.

Era redubertura d’aguest tram dera carretèra RD44, signifique ena practica que se restablirà eth pas de quinsevolh tipe de veïcul, includidi es de mès de 8,5m de longitud, qu’enquia ara les calie cercar d’autes rotes alternatives de comunicacion e transpòrt de merces entre Espanha e França. Cau arrebrembar qu’eth trafic de veïculs pesadi pera Val d’Aran s’auie redusit en un 85% des deth mes de deseme, quan se limitèc eth sòn pas per aguesta via.