Vielha, 15 de març de 2018.- Era mòda des sègles XVIII, XIX e prumeries deth XX arribe ena Val d’Aran dera man deth Hilat de Musèus des Tèrres de Lhèida e Aran, damb “Vestir era Mòda”. Se tracte d’ua exposicion itineranta qu’intègre ua seishantia de pèces d’indumentària de tota era província de Lhèida. Eth vestuari dera poblacion mos mòstre eth cambi sociau e economic que se viuec en Euròpa en aqueres epòques. Se poderà veir des de ròba quotidiana enquia vestits de mudar o de cerimònia e tanben complements coma sabates, chapèus, ombrel·les e bosses de man.

Aguesti an arribat enquiàs nòsti dies gràcies as familhes que les an sauvat coma bens preciosi, qu’an passat de generacion en generacion e que finaument an dat entara sua conservacion e difusion as musèus territoriaus.

Era mòstra se complemente damb indumentària, fotografies e retrats de colleccions particulares dera Val d’Aran. Destaque un ric vestit de batieg de darreries deth sègle XIX e començaments deth XX de tres pèces (vestit, capa e còha) deth hons deth Musèu dera Val d’Aran. Dat eth sòn mau estat de conservacion, acabe d’èster restaurat e s’a recuperat eth sòn aspècte originau.

Aguesta exposicion a passat pes musèus de Cervera, Tàrrega, Lleida, Museu de la Noguera, Ecomuseu de les Valls d’Àneu e Solsona. Era Val d’Aran represente era darrèra itinerància e destin finau d’aguesta mòstra.

Era exposicion se poderà visitar deth 16 de març enquiath 5 de mai de 2018, de deluns a dissabte de 17 a 20 ores. Era entrada ei gratuïta.