Vielha, 16 de març de 2018.- Eth Departament de Cultura dera Generalitat, eth Conselh Generau d’Aran e er Ajuntament de Les an acordat era reabilitacion dera Casa Haro coma sedença deth Centre d’Interpretacion des Hèstes deth Haro, en municipi de Les.

Es òbres entara reabilitacion dera Casa Haro s’amiaràn a tèrme graciés ara signatura d’un convèni entre eth Departament de Cultura, a trauès dera oficina de Supòrt ara Iniciatiua Culturau, er Institut Catalan deth Solèr, eth Conselh Generau d’Aran e er Ajuntament de Les, entara realizacion des òbres.

Eth finançament des òbres de reabilitacion dera Casa Haro, per un impòrt de 295.976,71€, anarà a cargue integralaments deth Departament de Cultura. Aguest finançament se correspon damb era subvencion en espècia concedida per part dera OSIC (Oficina de Supòrt ara Iniciatiua Culturau) ath Conselh Generau d’Aran, e que gerirà er Institut Catalan deth Solèr mejançant era encomana de gestion per execucion des òbres.

Eth sindic d’Aran, Carlos Barrera, a explicat qu’eth projècte dera Casa Haro ei un des passi naturaus de reconeishença e defensa dera cultura e er auviatge aranés dempús qu’es Hèstes deth Huec de Les e Arties, en deseme deth 2015, sigueren declarades Auviatge Immateriau dera Umanitat pera Unesco.

Era futura sedença deth Centre d’Interpretacion des “Hèstes deth Huec”, atau coma eth projècte museistic, tau e com a explicat eth sindic d’Aran, tanben aurà ua antena ena poblacion d’Arties, en Naut Aran, a on tanben se celèbre era Hèsta deth Huec era net de Sant Joan.