Vielha, 3 d’abriu de 2018.- Era conselhèra de Torisme d’Aran, Anna Díaz, avalorèc aué es resultats dera sason d’iuèrn e de Setmana Santa ena Val d’Aran, que s’apropèc ath plen d’aucupacion toristica en Aran ath quèir a finaus de març, çò qu’a hèt que se podessen realizar activitats d’espòrts d’iuèrn, mès tanben d’autes coma senderisme o de torisme actiu restacat damb era primauera, didec.
Anna Díaz, destaquèc egalaments es mès de 90.000 esquiaires qu’an escuelhut Baqueira Beret entre eth dissabte 24 de març e eth dimenge 1 d’abriu, encara qu’era meteorologia, ar atau coma ath long de tota era sason non a acompanhat deth tot. Aguest aspècte a beneficiat tanben ara ostalaria e era restauracion dera Val d’Aran, que segontes hònts deth sector an agut ua bona sason e Setmana Santa.
Anna Díaz, expliquèc que des de Torisme Val d’Aran, ja hè mès d’un mes e miei que trabalhen ena sason de primauera e estiu, damb era assisténcia a destacades hèires especializades en senderisme e biciclèta, atau coma era hèira B Travel 2018 que se celèbre en Barcelona deth 20 ath 22 d’abriu, eth mercat d’escapades deth 4 ath 6 de mai damb es enterpreses coma protagonistes, e ua campanha de promocion toristica dera Val d’Aran en França.
En çò que tanh as novetats entara sason d’estiu, era conselhèra Anna Díaz, a confirmat entà finaus de junh o principis de junhsèga, era dubertura deth Centre d’Interpretacion dera Artiga de Lin, qu’aufrirà informacion e coneishences sus era flòra e fauna aranesa e era rota d’accès ar Aneto des dera Val d’Aran, qu’anarà acompanhada coma enes darrèri ans dera regulacion der accès motorizat enes ribères d’Aiguamòg e dera madeisha Artiga de Lin, des de mejans de junhsèga a mejans de seteme, atau coma era metuda en marcha deth Tren toristic dera Artiga. Anna Díaz, a ahijut que, damb eth Centre d’Interpretacion dera Artiga, amassa damb era futura dubertura deth refugi, eth Conselh Generau d’Aran, acabarà de completar eth projècte entad aguest lòc dera Val d’Aran.
Fin finau, era conselhèra de Torisme a destacat era potenciacion e era consolidacion des activitats de torisme culturau e der auviatge dera Val d’Aran.
