Vielha, 6 d’abriu de 2018.- Eth Conselh Generau d’Aran, es ajuntaments e es EMDs d’Aran, an signat un convèni de collaboracion entara neteja des marges de pistes forestaus e era regeneracion naturau des bòsqui, damb er objectiu de produsir estèra entara produccion de biomassa.

Damb era signatura d’aguest convèni deth projècte de “Biomassa Val d’Aran” eth passat 27 de març, eth Conselh Generau d’Aran coma administracion forestau poderà realizar es trabalhs de neteja e regeneracion des bòsqui que son proprietat des ajuntaments e EMDs. Ena Val d’Aran, i a pròp de 400kms de pistes forestaus, des quaus 164 kms passen per masses arberades des montanhes.

Eth convèni ac an signat eth Conselh Generau d’Aran, es ajuntaments d’Arres, Bausen, Es Bòrdes, Bossòst, Naut Aran, Vilamòs, e Vielha e Mijaran; e es Entitats Municipaus Descentralizades d’Arró, Arties e Garòs, Bagergue, Gessa, Tredòs, Unha, Arròs e Vila, Aubèrt, Betren, Casau, Escunhau e Casarilh, Gausac, e Vilac. An demorat dehòra peth moment Les e Canejan.

Eth sindic d’Aran, Carlos Barrera, expliquèc qu’aué en dia, er anautit còst economic dera extraccion dera husta en airaus de nauta montanha, hè qu’aguesta activitat s’age convertit en testimoniau. Ena Val d’Aran, s’acumulen cada an mès de 20.000 mᵌ de husta, que se n’extrèn mens de 3.000 mᵌ. Era extraccion de husta non maderable e era possibilitat de convertir-la en biomassa (estèra e pellet), servirie entà atenuar es còsti dera extraccion e dera neteja des camins forestaus e es bòsqui.

En aguest sens, eth convèni de collaboracion contemple era extraccion der orde de 1.200 mᵌ de husta cada an, qu’es ajuntaments e EMDs cediràn gratuïtaments, pr’amor qu’en contrapartida eth Conselh Generau d’Aran, a trauès des servicis tecnics forestaus executarà era neteja des marges des camins e pistes forestaus, laguens dera politica seguida peth Govèrn d’Aran en çò que tanh as accions entara recuperacion, manteniment e melhora dera seguretat e era facilitacion der accès as pistes forestaus dera Val d’Aran.

Se tracte de husta prima procedenta d’arbes de diamètre normau mesurat a ua nautor de 1,30cm, d’entre 14cm e 26cm; e de husta espessa procedenta d’arbes damb un diamètre normau superior a 26cm.

Damb era neteja forestau, s’evite ath delà der envielhiment des bòsqui e s’artenh qu’es arbes agen bona salut, ath delà de previer e evitar eth risc d’incendis forestaus.

Aguesta iniciatiua deth Conselh Generau d’Aran tanben propicie era installacion de caudères de biomassa entà qu’era maximala quantitat possibla de biomassa produsida ena Val d’Aran, sigue tanben consumida, e ath madeish temps fomentar qu’enterpreses dera Val d’Aran se poguen dedicar en un futur ara produccion de biomassa entath profitament termic.