Vielha, 10 d’abriu de 2018.- Era conselhèra de Torisme, e Desvolopament Economic d’Aran, Anna Díaz, presentèc ager as sòcis de Foment Torisme Val d’Aran es resultats des activitats amiades a tèrme pera entitat en 2017, pendent era celebracion dera II Net deth Torisme. Er acte auec lòc en restaurant Er Occitan de Bossòst, un des establiments associadi a Torisme Val d’Aran.

Ena sua intervencion era conselhèra de Torisme d’Aran, metec en coneishença des assistents es resultats der exercici de 2017 ena Val d’Aran, que pendent er an incrementèc en 1,15% eth nombre de viatgèrs, en tot arténher era chifra de 223.637 viatgèrs damb un totau de 654.995 pernoctacions e damb ua aucupacion mieja annau de 47%, çò que signifique un aument d’un 4% en relacion ar an 2016. Per zònes, en Naut Aran era aucupacion siguec deth 38,38%, un punt superior ar an 2016. En Miei Aran siguec deth 48,88%, un punt peth dessús deth 2016. En Baish Aran, era aucupacion siguec d’un 31,04% damb un aument d’un 8% respècte a 2016.

En çò que tanh ara evolucion mensuau dera aucupacion, agost ei eth mes damb ua major aucupacion qu’artenh eth 74,60%, seguit de hereuèr damb un 64,32% e deseme damb eth 57,81%. Es mesi de major aucupacion en Naut Aran e Miei Aran son es mesi d’agost e hereuèr, en Baish Aran son es mesi d’estiu, junhsèga e agost.

En çò que tanh ara procedéncia des viatgèrs qu’an visitat era Val d’Aran, aguesti son majoritàriaments nacionaus procedenti de Catalonha (47,2%), Levante (13,5%), Madrid (11,4%), País Basc (6,5%) e Andalosia (5,9%).

Er an 2017 s’a incrementat leugèraments eth nombre de visitants estrangèrs, que ja representen eth 25% deth totau, procedenti de França (54,7%), Israèl (8,9%), Gran Bretanha (4,8%) Olanda (3,1%) e Alemanha (2,9%).

Foment Torisme Val d’Aran, gestione es burèus de torisme de Vielha e Salardú pendent tot er an, e eth d’Arties en estiu, amassa damb es punts d’informacion d’Aran Park, Aiguamòg e Artiga de Lin. Torisme Val d’Aran tanben gestione amassa damb Baqueira Beret, eth burèu de torisme de Tolosa. En conjunt des burèus de torisme an estat atengudi un totau de 99.434 visitants eth 2017.

En çò que tanh as accions desvolopades per Torisme Val d’Aran en 2017, Anna Díaz, expliquèc que se contunhe en tot trabalhar ena consolidacion dera imatge dera destinacion toristica Val d’Aran, a trauès des certificacions qu’apòrten diuèrsi valors de mèrca. En aguest aspècte, Foment Torisme Val d’Aran compde damb era certificacion Biosphere, Smart Destination, e eth sagèth de destinacion de torisme familhau. En aguest sens Anna Díaz, auancèc que se trabalhe en reconeishement de païsatge culturau agro-pastoral per part dera Unesco, laguens deth projècte dera candidatura dera Val d’Aran coma Patrimòni dera Umanitat.

En tot contunhar damb era collaboracion damb era Agéncia Catalana de Torisme e Baqueira Beret, Díaz, auancèc qu’aguest 2018 se signarà un convèni de collaboracion damb era enterpresa deth sector ciclista Massi, en tot auer en compde era sua projeccion internacionau e era demanda d’activitats restacades damb era practica deth ciclisme que de mès en mès aumente ena Val d’Aran.

Pendent era celebracion dera IIau Net deth Torisme dera Val d’Aran, era conselhèra, Anna Díaz, arregraïc era confidança, era implicacion e eth compromís des 200 sòcis de Foment Torisme Val d’Aran, per contribuïr ath desvolopament e era promocion dera Val d’Aran coma destinacion toristica de nauta montanha de referéncia, atau coma era aportacion dera totalitat der impòrt provenent dera taxa toristica per part des ajuntaments aranesi e deth Conselh Generau d’Aran.

Er an 2017 Foment Torisme Val d’Aran destinèc un pressupòst totau de 850.000€ entàs accions de promocion dera mèrca “Val d’Aran, era esséncia des Pirenèus”.
Atau madeish en 2017 Torisme Val d’Aran a collaborat en mès de 60 eveniments culturaus, esportius e sociaus que s’an organizat ena Val d’Aran.

Fin finau, era web de Val d’Aran a incrementat en un 19% eth nombre d’usatgèrs en tot passar de 167.291 en 2016 a 199.457 en 2017. Es mesi d’estiu son es de major nombre de visites.