Eth pròplèu dijaus, dia 10 de mai, entàs 19:00 ores aurà lòc ena glèisa de Sant Joan d’Arties era inauguracion dera exposicion fotografica de Xavier Playà “Sons e silencis. Lums e ombres”. Era inauguracion compdarà tanben damb era preséncia deth sindic d’Aran, Carlos Barrera.

Era evolucion des maquines fotografiques moa a hèt a desbrembar era sua origina coma cramba escura. Ena foscor impressionam es sentits en tot crear imatges pròpies, atau coma en silenci entenem eth resson de campanes immobiles.

En aguesta exposicion vos convidam a bastir rebrembes, a visitar arquitectures impossibles e a sentir eth pas deth temps. Coma eth relampit qu’en plea net convertís es ombres en lum e eth silenci en tarrambòri, aguestes fotografies mòstren jòcs de lums e ombres que transformen aquerò qu’ei coneishut en desconeishut, aquerò que forme part dera vida vidanta en quauquarren estonant, aquerò qu’auiem per solid e perdurable en delicat e fugaç… Aquerò qu’ei barrat e inexpugnable mos convide a entrar.

Eth batèc des ales des audèths, eth lent moviment des bromes o es sons des campanes mos parlen deth pas deth temps e d’aqueri que ja non i son. Sons e silencis, lums e ombres d’un temps que non s’arture.

Vielha, 4 de mai de 2018

Conselh Generau d’Aran: Núria Sanjuan

Foto: Xavier Playà