Vielha, 11 de mai de 2018.- Eth Conselh Generau d’Aran mejançant es recorsi deth convèni de collaboracion damb era Òbra Social “La Caixa” a installat ua naua codina enes installacions deth Centre Aucupacionau ADDA (Associacion de Discapacitats dera Val d’Aran).

Era naua codina s’includís laguens eth programa de melhores des installacions deth centre amiat a tèrme peth Conselh Generau d’Aran, que tanben includís eth cambi de estòrs enes aules e era melhora dera gessuda ar exterior dera terrassa. Ad aguestes melhores s’a destinat 12.886 €.

Cap arrebrembar qu’eth Govèrn d’Aran en collaboracion damb era Òbra Social “La Caixa”, tanben a destinat part des recorsi d’aguest convèni era installacion de 8 naui bancs e 16 cagires exteriores entara Residéncia Geriatrica Sant Antòni de Vielha.

Eth sindic d’Aran, Carlos Barrera, expliquèc qu’aguestes accions permeten melhorar e contribuïr ath progrès des persones e dera societat, damb especiau incidéncia enes collectius mès vulnerables.

Era Òbra Sociau “La Caixa” damb er objectiu de bastir ua societat e mès justa, aufrís oportunitats as persones que mès ac an de besonh, e s’assolide coma era fondacion mès importanta de tota Espanha per recorsi invertidi en accion sociau e en ua des mès importantes d’Euròpa e de tot eth mon.