• Ei era quatau participacion d’“Es Fradins de Vielha” ena mòstra qu’organize ADIFOLK despús de participar er an 2015 en Turín (Itàlia), en 2013 en Verona (Itàlia) e en 2001 en Copenhaguen (Dinamarca).

Era passada dimenjada, der 11 ath 13 de mai, eth grop de dances araneses “Es Fradins de Vielha” participèren ena 31au Amassada Internacionau Adifolk de Manresa “Pònts de cultura: un viatge d’anada e retorn, Euròpa-America-Catalonha”.

Eth cap-lòc deth Bages acuelhec aquerò que pendent trenta ans a hèt Adifolk per diuèrses ciutats europèes: mòstres des diuèrsi encastres dera cultura populara catalana.

Eth recorregut començat en Manresa contunharà, deth 27 de junh ath 8 de junhsèga, en Washington. En cap-lòc des Estats Units, cada an s’i hè er Smithsonian Folklife Hestivau, era amassada de cultura populara mès importanta d’America deth Nòrd, qu’aguest ostiu harà cinquanta ans. Cada an i son convidades diuèrses cultures e ua des escuelhudes d’enguan ei era catalana. Enquia Washington, donques, se desplaçaràn diuèrses manifestacions coma tors umanes, dança, artesania e representantes des nòstes hèstes. Es responsables d’Adifolk ahigen que auràn un papèr important es grops que pendent aguest temps les an acompanhadi per toti es cornèrs d’Euròpa.

Ei era quatau participacion d’”Es Fradins de Vielha” ena mòstra qu’organize ADIFOLK dempús de participar er an 2015 en Turín (Itàlia), en 2013 en Verona (Itàlia) e en 2001 en Copenhaguen (Dinamarca).

Vielha, 14 de mai de 2018

Conselh Generau d’Aran: Núria Sanjuan

Fotos: Es Fradins de Vielha