Vielha, 16 de mai de 2018.- Damb motiu deth Dia Internacionau des Musèus, aguest diuendres 18 de mai, eth Musèu dera Val d’Aran presente… TARDE JURASSICA!!

Tres uassi de dinosaure arribèren deluns en Musèu dera Val d’Aran, procedents deth Museu de la Conca Dellà (Isona), ua iniciativa d’intercambi de pèces impulsada peth Hilat de Musèus des Tèrres de Lhèida. Aguesti fossils de hè mès de 68 milions d’ans corresponen a tres adrosaures, ua des darrères espècies de dinosaure abans dera sua extincion. Pendent tota aguesta setmana, ena recepcion deth musèu se pòden visitar dues maishères expausades ena veirina e ua tíbia que se pòt tocar!

En tot profitar era preséncia d’aguestes pèces convidades, eth Musèu dera Val d’Aran a organizat entath diuendres 18 de mai ua seria d’activitats, entà toti es publics e gratuïtes, restacades damb es dinosaures.

Entath public familiau, es educadores deth Museu de la Conca Dellà, amiaran a tèrme eth talhèr “Hem de paleontològs” entà qu’es mès petiti se poguen emportar un dent de dinosaure tà casa. Es places son limitades enquia 25 persones.

A continuacion, tàs 20 ores, eth Dr. Àngel Galobart (director deth nomentat musèu) presentarà era charrada: “Es dinosaures deth Pirenèu. Es darrèrs d’Euròpa”, dant a conéisher aguest apassionant passat jurassic.

Es dies 18, 19 e 20 de mai era entrada serà gratuïta en Musèu dera Val d’Aran (Vielha) e en Ecomusèu Çò de Joanchiquet (Vilamòs), iniciativa que se hè cada an damb motiu dera celebracion deth Dia Internacionau des Musèus.