Vielha, 18 de mai de 2018.- Er Institut Cartografic de Catalonha (ICGC) e er IEA-Academia aranesa dera lengua occitana signèren eth passat diuendres un convèni peth que er ICGC cedís ar IEA era toponimia aranesa dera base de donades toponimica 1:5.000 organizada e estructurada entà poder èster actualizada e ara fin oficializada.

Era informacion dera toponimia aranesa proven dera base toponimica de Catalonha 1:5.000 der ICGC.

Er ICGC gerís e manten eth còrpus toponimic de Catalonha ara escala 1:5.000, basat en trabalh de camp de recèrca per tot eth territòri, e l’actualize de manèra contínua. Per aute costat, collabòre damb eth Conselh Generau d’Aran entà validar e apròvar era toponimia aranesa, atau coma era informacion que genère er ICGC sus projèctes qu’afècten er encastre aranés.

Damb era cession dera toponimia oficializada, er IEA-AALO a era volontat d’amiar a tèrme e publicar eth Nomenclator dera toponimia dera Val d’Aran. Er ICGC i collaborarà, en tot aportar era experiéncia aquerida ena elaboracion deth Nomenclator oficiau de toponimia major de Catalonha.

Era signatura deth convèni que debanèc ena sedença der IEA ena Val d’Aran anèc a cargue de Jaume Massó, director der ICGC e de Jusèp Loís Sans, president der IEA-Academia aranesa dera lengua occitana, acompanhadi de Jèp de Montoya, president dera Seccion Aranesa der IEA.

Eth convèni tanben servirà entà daurir naues linhes de collaboracion entre es dues entitats.