Vielha, 18 de mai de 2018.- Ua delegacion dera enterpresa tecnologica surcoreana JSLidar, partner dera enginheria aranesa Arantec Enginnering e ua delegacion deth Korea Meteorological Institut (KMI), visiten aguesti dies era Val d’Aran entà barrar acòrds de collaboracion.

Es representants dera enterpresa surcoreana JSLidar e deth KMI acompanhadi pes directius d’Arantec, an estat arrecebudi en Conselh Generau d’Aran pera conselhèra de Torisme e Desvolopament Economic, Anna Díaz, qu’a avalorat fòrça positivaments eth hèt qu’ua enginheria aranesa coma ei Arantec, sigue capaça d’internacionalizar era sua tecnologia e daurir naui mercats coma er asiatic a trauès des acòrds empresariaus e institucionaus damb Corèa deth sud, en tot demostrar que des d’Aran tanben se pòt produsir tecnologia de prumèr nivèu.

Er Institut Meteorologic de Corèa (KMI), ei ua institucion publica depenenta dera Administracion Meteorologica governamentau, que s’establic entà dar supòrt e cultivar eficientament era promocion e eth desvolopament dera industria meteorologica en Corèa a fin de contribuïr ath desvolopament dera industria e era economia nacionau. KMI tanben dar supòrt ara investigacion e eth desvolopament de tecnologia meteorologica e era cooperacion internacionau a trauès der escambi d’experiéncies meteorologiques.

JSLidar ei era unica enterpresa coreana especializada enes tecnologies de hònts de lum e sensors Lidar de naut potenciau entà ampliar era fiabilitat e optimizar eth rendiment der objectiu de medicion. JSLidar a desvolopat un sensor de bruma e visibilitat de nauta gamma basat en láser, utilizat en aeropòrts, agéncies de gestion de carretères e agéncies meteorologiques, qu’ajude a previer accidents causadi pera dolenta visibilitat. Actuauments ei en tot desvolopar un sensor climatic melhorat, que s’integraràn es foncions des sensors de visibilitat de bruma, atau coma era deteccion de ploja e nhèu. Ei per aguest motiu qu’a establit era sua aliança damb Arantec Engineering. Era companhia JSLidar ei dirigida pes dus ex-directius de Samsung, Kim Kijong, CEO, e Hwang Juneho, vice-president dera equipa comerciau.

Era enginheria aranesa Arantec ei ua enterpresa encargada de proporcionar solucions “cloud” entara medicion e contraròtle de fenomèns mieiambientaus. S’encargue de dessenhar, desvolopar e produsir eth sòn pròpri logicial e hardware entà aufrir as clients solucions complètes e fiables entara Internet des Causes (IOT). En definitiva, solucions uniques integrades, que siguen fiables, compatibles, rendables, faciles d’implementar e intuitives d’emplegar.

Arantec Enginnering comercialize es solucions complètes Smarty Planet de monitorizacion e telecontraròtle, dessenhades entàs besonhs de diuèrsi sectors, coma, òbres idrauliques, carretères, ciutats intelligentes, agricultura, aeropòrts e camins de hèr.

Es estacions de sensors Smarty Planet son solucions de monitorizacion e telecontraròtle dessenhades especificaments entà cabaus e arrius (Smarty River), monitorización dera nhèu (Smarty Snow), quantitat e qualitat dera aigua (SmartyWater), estacions meteorologiques (SmartyMeteo), contraròtle d’incendis forestaus (Smarty Forest), qualitat acostica e ambientau (Smarty Sound) e qualitat der aire (Smarty Air).

Actuauments desvolòpe solucions encaminades entara modelizacion d’analisi de risqui e cambi climatic, probabilitats de risc en ciutats e mainstreaming encaminades ara resiliència e era reduccion deth risc de desastre (DRR).

Eth CEO d’Arantec Engineering, Eisharc Jaquet, expliquèc qu’eth prumèr contacte damb JSLidar se produsic en Amsterdam, laguens dera Meteorological Technology WorldExpo, a on s’establiren es prumères linhes de collaboracion. En aguesta aliança JSLidar aportarà eth sensor de visibilitat e Arantec era sua tecnologia desvolopada ena plataforma web, entà crear ua solucion finau de mercat, qu’era enterpresa aranesa aportarà es sensors complementaris de medicion. Era collaboracion compde damb eth supòrt deth Korea Meteorological Institut.

Arantec Engineering, a desvolopat entre d’auti eth hilat de sensors e estacions de medicion de cabaus d’arrius ena Val d’Aran entath Conselh Generau d’Aran, eth projècte RisqHydro, promoigut pera Deputacion de Lhèida, damb era participacion des Conselhs Comarcaus deth Naut Urgelh, Nauta Ribagorça, Palhars Jussà, Palhars Sobirà, eth Conselh Generau d’Aran, e era Communauté de Communes du Canton de Saint Béat de França, consistenta en 32 estacions idrologiques e ua plataforma web, coma servici d’Alèrta Primairenca deth risc d’inundacion (SAPI). Tanben participe en escambi bidireccional de donades dera conca der arriu Garona mejançant es estacions Smarty Planet, dempús dera signatura deth convèni entre eth Conselh Generau d’Aran e era Confederacion Idrografica der Ebre (CHE).

Arantec Engineering a estat distinguida recentaments damb eth prèmi Rèpte d’Innovacion deth Projècte ANYWHERE autrejat pendent era 5au Assemblada Generau deth grop de trabalh ANYWHERE celebrada en Spiez, Soïssa, eth passat 6 de març.