Vielha, 31 de mai de 2018.- Era darrèra dimenjada auec lòc en San Juan de Plan – San Chuan (Òsca), era reünion deth Grop de Trabalh dera Declaracion dera UNESCO coma Plan Culturau Immateriau dera Umanitat des Hèstes deth Huec enes Pirenèus, constituït per membres de toti es lòcs a on se cremen haros e halhes, qu’i a entre es localitats franceses, andorranes, catalanes, araneses e Naut aragoneses, damb er objectiu d’impulsar era creacion d’ua associacion de caractèr internacionau qu’amasse a totes es institucions e collectius qu’an coma objectiu protegir e impulsar aguesti eveniments ancestraus, testimònis dera identitat pirenenca e motors toristics des territòris.

Eth pòble de San Juan de Plan ei eth quau se place en extrèm mès occidentau deth mapa des halhes, a on se dan cita mès de 63 localitats: 3 d’Andòrra, 34 de França, 17 de Catalonha, entre eres Les e Arties, e 9 d’Aragon.

Era cita, ena que s’acordèc eth “Calendari Fallaire” entath pròplèu an, compdèc ath torn d’un centenat de participaires, Jèp de Montoya, en representacion deth Conselh Generau d’Aran.

Era amassada compdèc damb ua exposicion que se compause de mès de 50 imatges enes que se pòt veir com s’implique era comunitat enes prètzhèts dera preparacion dera husta pendent es mesi prealables ara celebracion o mentre bastissen es halhes d’aguesta tradicion ancestrau.

En 2015, era UNESCO includic ena sua Lista Representativa der Auviatge Culturau Immateriau dera Umanitat as Hèstes deth Huec deth solstici d’estiu enes Pirenèus. Des d’alavetz se celèbre aguesta amassada, en tot integrar as quate comunitats territoriaus que la formen.