Vielha, 3 de juriòl de 2018.- Tecnics e agents de Miei Naturau deth Conselh Generau d’Aran an confirmat un nau atac der os Goiat ena zòna de Rius, ena Val d’Aran, damb eth resultat d’ua cavala mòrta.

Es darrères setmanes s’an comptabilizat quate naui atacs de Goiat, eth prumèr en Pla de Beret damb eth resultat d’ua oelha mòrta, eth dusau en Palhars e dus darrèri atacs, un en brinhons d’abelhes en Garòs e eth darrèr de Rius.

En aguest sens cau arrebrembar qu’eth darrèr plen deth Conselh Generau d’Aran deth passat 15 de junh, acordèc per unanimitat demanar ara direccion generau de Politiques Ambientaus e Miei Naturau dera Generalitat de Catalonha era retirada der os Goiat, liberat en Palhars eth 6 de junh de 2016 en marc deth programa Piroslife.

Er acòrd deth plen deth Conselh ven motivat pes atacs reïteradi, eth comportament anomal der os Goiat e era sua fixacion peth bestia equin. Eth manejament extensiu d’aguest bestia enes pastures de nauta montanha enes mesi de primauera, estiu e tardor dificulte enòrmaments era aplicacion de mesures de proteccion coma pòden èster era d’agropacion de ramats o barraments perimetraus.

Eth Conselh Generau d’Aran reafirme eth bessonh d’accelerar es gestions entara retirada der os Goiat mentre se contunhen en tot aplicar es mesures aversives que mèrquen es protocòus tecnics deuant es accions der os. Cau arrebrembar que, enes darrèri dus ans, s’an triplat es atacs ena Val d’Aran, en tot coïncidir damb era libera de Goiat en 2016.