Vielha, 11 de junhsèga de 2018.- Eth Conselh Generau d’Aran a hèt publica era licitacion deth contracte d’arrendament entara gestion e explotacion deth refugi de montanha d’Artiga de Lin.
Eth contracte a per objècte er arrendament, mejançant concors public, deth refugi de montanha nomenada Artiga de Lin, plaçat en territòri d’Aran, e que permet pera sua configuracion e foncionament coma refugi de montanha en un lòc d’excepcionau e de valor païsatgistic. Era sua ubicacion ei estrategica entà potenciar era connectivitat damb eth refugi deth Hospice de France e perméter er accès ath territòri d’Aran pes passi naturaus dera Monjoia e era Escaleta.
Eth nau refugi dera Artiga de Lin a de méter tanben en valor era rota aranesa der Aneto a trauès deth Còth des Aranesi, tanben coneishut coma Còth deth Hòro.
En çò que tanh as possibilitats de realizar rotes de senderisme e de nauta montanha, des d’aguest nau refugi se daurís ua grana varietat de possibilitats. Cau arrebrembar que, en aguesti darrèri ans, eth Conselh Generau d’Aran a potenciat eth valor naturau der entorn dera Artiga de Lin damb eth bastiment deth parcatge ath costat dera ermita dera Artiga de Lin, eth sendèr dera aigua, que connècte aguest parcatge damb eth Plan dret dera Artiga, en tot destacar lòcs tan emblematics coma era hònt deth Gresilhon, es Uelhs deth Joeu, eth pròpri arriu Joeu e es Plans dera Artiga de Lin.
Aguest entorn compde tanben damb un Tren toristic que connècte eth parcatge dera ermita damb es Plans dera Artiga de Lin e damb eth Centre d’Interpretacion dera Artiga de Lin que serà inaugurat eth pròplèu dia 16 de junhsèga.
En tot retornar as òbres deth nau refugi dera Artiga de Lin, eth pressupòst deth sòn bastiment a estat de 262.000 èuros provenenti deth Plan de Foment deth Torisme dera Generalitat de Catalonha. Era capacitat d’aguest refugi serà de 25 places.
Es condicions deth concors de licitacion se pòden consultar en: https://contractaciopublica.gencat.cat/ecofin_pscp/AppJava/notice.pscp?idDoc=33825257&reqCode=viewCn&idCap=31230076&