Vielha, 17 d’agost de 2018.- Eth Conselh Generau d’Aran amie a tèrme aguesti dies es trabalhs d’urbanizacion e d’engodronament des entorns deth depòsit de dèishes de Bèusa en Vielha e Mijaran.

Aguest nau equipament, que hè dus mesi que foncione, a significat ua melhora fòrça important dera gestion ambientau en tot facilitar era collaboracion ciutadana ena gestion sostenible deth miei ambient.

Eth Govèrn d’Aran destine un pressupòst de 55.000 € en aguesta accion que tanben includís era installacion d’un punt de contròl d’accès entà delimitar es oraris enes qu’es usatgèrs pòden accedir ath depòsit.

Eth conselhèr de Territòri d’Aran, José Antonio Boya, s’a mostrat satisfèt des dus prumèrs mesi de foncionament deth depòsit de Bèusa, donques a dit qu’es usatgèrs s’an anat en tot acostumar a utilizar aguest nau equipament que permet optimitzar era gestion deth servici de recuelhuda selectiua de residus municipaus en tota era Val d’Aran.

Era naua installacion ei bastida sus ua parcèla d’uns 4.200 m2 cedida pera ACA (Agéncia Catalana der Aigua) ath Conselh Generau d’Aran entara adeqüacion dera installacion deth depòsit de dèishes que resultèc maumetut pendent es aiguats de 2013.

Eth Conselh Generau d’Aran a previst executar en brèu era dusau fase de bastiment deth depòsit, que ja compde damb eth finançament dera Agéncia de Residus de Catalonha e deth sistèma integrat de gestion Ecoembes. Aguesta dusau fase ei pressupostada en 597.943€ e permeterà qu’er equipament compde fin finau damb un totau de 14 punts de descarga.