Luís Carlos Medina, conselhèr d’Espòrts d’Aran, e Maria José Estévez, presidenta deth Conselh Esportiu dera Val d’Aran, an signat un convèni tà dar compliment ath marc de collaboracion entre eth Conselh Generau d’Aran e eth eth Conselh Esportiu dera Val d’Aran entà fomentar e coordinar er espòrt en edat escolara (4-18ans).

Era aportacion economica deth Conselh Generau d’Aran entar exercici 2018 serà 12.000 € entath finançament des activitats qu’amie a tèrme eth Conselh Esportiu dera Val d’Aran en exercici 2018.

Eth conselhèr d’Espòrts d’Aran, Luís Carlos Medina, a manifestat: “Eth Conselh Generau d’Aran, coma govèrn deth territòri aranés, vò collaborar damb er espòrt en toti es sòns ambits, especiaument en foment des espòrts pròpris coma esturments educatius e de desvolopament personau e professionau des persones entath quau, entre d’auti, a signat un convèni damb eth Consell Català de l’Esport dera Generalitat de Catalunya entath foment der espòrt”.

Pera sua part, Maria José Estévez, presidenta deth Conselh Esportiu dera Val d’Aran a soslinhat: “Eth Conselh Esportiu dera Val d’Aran a coma principaus objectius eth foment, era organizacion e era promocion dera activitat esportiva en edat escolara laguens deth territòri, en tot partir dera premissa que mejançant es valors educatius e formatius implicits en espòrt, se pòden transméter valors positius entara nòsta societat coma acceptacion des règles, eth civisme, eth trabalh en equip, eth respècte, era tolerància, eth dialòg e era comprension”.

Es activitats que responen ara sua finalitat son coordinar, e se cau organizar, es activitats esportives en edat escolara, entre es quaus destaque er Espòrt Blanc, a on es alumnes de 3au e 4au de primària de tota era Val d’Aran (uns 180 mainatges) pendent eth 2au trimesadèr desvolopen es espòrts de nhèu ena estacion d’esquí aranesa de Baqueira Beret.

Tanben i an es Jòcs Esportius Escolars o es activitats esportives extraescolars que pretenen eth foment der espòrt. Atau madeish, entre d’auti, pòden assessorar e coordinar es entitats que realizen activitat esportiva pròpia, collaborar en objècte de cercar era mielhora qualitativa dera practica esportiva, prebotjar plans entara mielhor utilizacion des installacions esportives e des servicis complementaris, atau coma executar o gestionar era politica esportiva deth territòri segontes convènis establits damb es entitats publiques o privades competentes.

Eth Conselh Esportiu dera Val d’Aran a coma organ de govèrn era Assemblea Generau, qu’ei er organ superior de participacion e representacion, e a d’èster integrada peth Conselh Generau d’Aran, es ajuntaments, es centres docents, es clubs, es associacions e federacions esportives, e d’autes entitats deth territòri relacionades damb er espòrt. Aguesta circonstància a de perméter qu’eth Conselh Esportiu sigue ua veritabla entitat integradora de tota era activitat esportiva e convertint-se d’aguesta manèra en motor basic der espòrt en edat escolara.

Vielha, 27 d’agost de 2018

Conselh Generau d’Aran: Núria Sanjuan