Vielha, 29 d’agost de 2018. Ager, en pòble de Garòs, se realizèc un aumenatge en vida ath Mossèn Jusèp Amiell, damb era collocacion d’un bust deuant era glèisa de Sant Julià.
Ar acte assistiren eth sindic d’Aran, Carlos Barrera, eth vicesindic d’Aran, Luis Carlos Medina, baile de Naut Aran, Cesar Ruiz Canela, baile dera EMD Arties e Garòs, David Torres e Mª Angels Ordax.
Eth bust de Mossèn Jusèp Amiell, òbra dera escultora aranesa, Gloria Corona Socasau, ei un reconeishement a tota era sua trajectòria deth Mossèn, Archiprèst dera Val d’Aran de 1991 a 2005 e Canonge dera Catedral de Santa Maria dera Seu d’Urgelh en 2011, ath delà des guerdons coma, era Medalha d’Aur deth Conselh Generau d’Aran en 2010 e era Crotz de Sant Jòrdi dera Generalitat de Catalonha en 2012.
Eth sindic d’Aran, volec destacar que “Mossèn Amiell ei un exemple en vida que s’a de méter en valor” ath delà qu’era escultura ei “un reconeishement fisic a tot eth trabalh, compromís e defensa dera identitat deth nòste país e ath pòble de Garòs, qu’a amiat a tèrme Mossèn Jusèp Amiell pendent tota era sua trajectòria”
Barrera, arrebrembèc qu’era recuperacion e restauracion dera anciana sacristia dera glèisa siguec a trauès de hons pròpris de Mossèn Amiell.
Era ubicacion dera escultura a estat escuelhuda peth vessant religiós e professionau de Mossèn Amiell, e ara sua estima peth pòble de Garòs e era Val d’Aran. Aguesta iniciatiua promoiguda des deth Plen deth Conselh Generau d’Aran a estat finançada peth pròpri Govèrn d’Aran e er Ajuntament de Naut Aran.
