Vielha, 14 de seteme de 2018.- Eth president dera Deputacion de Lhèida, Joan Reñé, acompanhat dera equipa directiva dera institucion ilerdenca, s’amassèc aué damb eth sindic d’Aran, Carlos Barrera e es conselhèrs deth Govèrn d’Aran, ath delà des bailes e bailes pedanis des poblacions dera Val d’Aran, en Conselh Generau d’Aran.

Eth president dera Deputacion de Lhèida a destacat qu’aguesta reünion s’enquadre ena dinamica dera equipa de presidéncia dera Deputacion d’èster presents en territòri, e en aguest cas, en tot atier ara singularitat dera Val d’Aran, mès ath delà des reünions periodiques que coma president manten damb eth sindic d’Aran, entà arrecéber de prumèra man era interllocucion damb eth territòri. Reñé a destacat qu’era relacion damb eth Conselh Generau d’Aran ei fòrça dirècta, fòrça intensa e fòrça comprometuda.

Joan Reñé a explicat que laguens dera collaboracion damb eth Conselh Generau d’Aran cau destacar tot çò que hè referéncia ar àmbit dera sanitat, pr’amor qu’era Deputacion a er objectiu de mantier e melhorar era eficiéncia en aguest àmbit. En çò que tanh as comunicacions, Reñé, a destacat era carretèra de Vilamòs, que ja se n’a redactat eth projècte entara dusau fasa de melhora d’aguesta carretèra damb er objectiu de poder licitar era òbra enguan e executar-la a compdar de 2019 damb ua inversion de 1.860.000 €.

Un des projèctes importants entara Deputacion de Lhèida, ei era prepausa d’extension dera fibra optica en totes es comarques de Lhèida, que Reñé n’a dit que serà un projècte emblematic, pr’amor que, en collaboracion damb era conselheria de Politiques digitaus e Administracion Publica dera Generalitat de Catalonha, enes pròplèus 5 ans, se realizaràn es inversions de besonh entà que toti es municipis e nuclèus de poblacion de Lhèida agen connexion damb ample de banda. Entà Reñé aué en dia se hè imprescindible entara gestion personau e economica des ciutadans auer accès as madeishes oportunitats se visque a on se visque. Era deputacion de Lhèida invertirà en aguest projècte entre 10 e 15 milions d’èuros annaus.

Pera sua part, eth sindic d’Aran, Carlos Barrera, a avalorat fòrça positivaments era visita dera equipa de presidéncia dera Deputacion damb es conselhèrs e bailes dera Val d’Aran. Barrera a arrebrembat qu’era darrèra legislatura siguec fòrça malaisida en aspècte economic entath Conselh Generau d’Aran pes ajusti economics que se les calec adoptar e a arregraït era collaboracion prestada en aqueri moments pera Deputacion.

Eth sindic d’Aran, a hèt mencion ath supòrt dera Deputacion entad aqueriment des naui locaus des servicis administratius der Espitau dera Val d’Aran, que permeteràn er ampliament der airau quirurgic der espitau, e ara consolidacion deth programa de deteccion de càncer de còlon, en àmbit sanitari. Barrera a explicat tanben qu’era Deputacion de Lhèida finançarà 25% des Hons FEDER destinadi ath projècte de melhora der accès ar entorn naturau dera Val d’Aran ath qu’eth Conselh Generau d’Aran destinarà 1.200.000€, e que serà ua realitat aguesti pròplèus mesi, en qu’es pistes forestaus ja seràn reabilitades. Entà Barrera, aguesti son aspèctes vitaus entara Val d’Aran coma destinacion toristica de prumèra magnitud tant en estiu coma ena sason d’iuèrn.

Fin finau, eth sindic d’Aran a destacat era absoluta e leiau collaboracion existenta entre eth Conselh Generau d’Aran e era Deputacion de Lhèida.

Inauguracion dera exposicion “Perseguits e Sauvats”

Un còp finalizada era reünion, eth sindic d’Aran e eth president dera Deputacion de Lhèida s’an desplaçat enquiara glèisa de Sta. Maria de Mijaran entà inaugurar era exposicion “Perseguits e Sauvats. Non volien qu’existíssem” que parle des jueus que crotzèren eth Pirenèu de Lhèida en tot caminar, en tot deishar ath darrèr es sues vides, familhes e amics. En tot desbrembar forçadaments es sòns larèrs, es sues ciutats, eth sòn país, entà poder víuer en patz. Era exposicion tanben parle dera gent anonima e desinteressada que viuie en Pirenèu e que les dèc eth sòn supòrt.

Eth projècte “Perseguits e Sauvats” ei ua iniciatiua dera Deputacion de Lhèida, era quau, a trauès der Institut d’Estudis Ilerdencs, eth Patronat de Torisme e era collaboracion d’ajuntaments, conselhs comarcaus deth territòri e deth Conselh Generau d’Aran, a coma principau objectiu recuperar era memòria deth pas peth Pirenèu ilerdenc de milèrs de jueus que hugien der Olocaust pendent era Dusau Guèrra Mondiau.

“Perseguits e Sauvats. Non volien qu’existíssem” se poderà veir en Sta. Maria de Mijaran enquiath pròplèu 4 de noveme.