Vielha, 17 de seteme de 2018.- Eth Conselh Generau d’Aran a celebrat aué eth prumèr Plen ordinari dempús der estiu.

Eth sindic d’Aran, Carlos Barrera, a manifestat ath finalizar eth Plen, qu’eth Govèrn d’Aran a liderat pendent es darrèri mesi toti es ahèrs qu’an afectat ara Val d’Aran aguest estiu e qu’an estat tractadi en aguest Plen.

Eth Plen deth Conselh Generau d’Aran a aprovat era rectificacion dera mocion en relacion ath programa de reintroduccion der os ròi e era sua afectacion en territòri aranés. En aguest sens eth sindic d’Aran, Carlos Barrera, expliquèc que çò que s’a aprovat son modificacions tecniques de definicion deth document de protocòu sus eth comportament d’exemplars d’ossi reintroducidi, que son era totalitat des ossi deth Pirenèu pr’amor que provien dera reintroduccion der an 1995, en tot liderar era urgéncia dera redaccion d’aguest protocòu entà dar-li traslat ara Generalitat de Catalonha, entà qué coma signatària amassa damb es Govèrns espanhòus e francés e es comunitats autonòmes d’Aragon e Navarra , donguen per bon aguest protocòu e servisque coma huelha de rota entà actuar deuant situacions non desirades provocades per quinsevolh des exemplars d’os qu’i a en Pirenèu. Er estudi determinarà era convivéncia dera preséncia der os damb totes es activitats economiques e umanes que s’amien a tèrme actuauments en Pirenèu, e determinarà tanben eth nombre d’ossi que pòt suportar aguest territòri, didec Barrera.

Pendent eth Plen d’aué, tanben s’a tractat sus era afectacion ecologica der arriu Garona ath sòn pas per Aran. En aguest sens eth sindic d’Aran, a dit qu’eth Conselh Generau d’Aran s’a preocupat per aguest ahèr des deth moment en qu’eth passat 12 de mai se produsic er esbauçament ena ribèra de Valarties, a més, damb era turbelhada des aigües der arriu Garona. Carlos Barrera, expliquèc que s’an metut en contacte damb era CHE, per qué era situacion cada viatge ei mès preocupant. Pendent es darrèri dies s’a produsit era visita ara Val d’Aran d’ua enginheria contractada pera CHE amassa damb era enterpresa TRACSA entà trobar era solucion tecnica que permete assolidar es efèctes der esbauçament e eth rosigue de materiaus. Eth sindic d’Aran a dit qu’era CHE amiarà a tèrme ua accion d’urgéncia en tot bastir ua escolhera entà restancar tot eth materiau der esbauçament e canalizar era aigua entà garantir que s’incorpòre ar arriu Valarties en perfècte estat de puressa. Barrera, tanben expliquèc que s’installaràn sondes de seguretat de medicion en temps reau entà en cas d’alèrta poder previer ara poblacion. Eth sindic d’Aran a explicat tanben que s’aurà de hèr un estudi sus era afectacion enes alteracions dera reproduccion des espècies de peishi qu’abiten enes aigües afectades, coma trueites e cavilats, aguesti darrèri en risc d’escandilhament.

Eth sindic d’Aran, Carlos Barrera tanben se hec referéncia ara preocupacion existenta enes poblacions deth Baish Aran sus eth cambi de modèl dera atencion primària ena Val d’Aran. Barrera expliquèc que s’organizaran reünions enes ajuntaments deth Baish Aran qu’atau ac solliciten entà explicar es prepauses dera direccion de Salut Publica dera Val d’Aran sus era evolucion deth modèl, tau coma se hè en tot Catalonha, cap a ua atencion mès personalizada enes domicilis entà que es persones non les calgue desplaçar-se ath CAP. En çò que tanh ar ampliament der airau quirurgic der Espitau dera Val d’Aran, eth sindic d’Aran a declarat qu’ua UTE d’enterpreses serà era encargada deth bastiment der ampliament d’aguest airau que s’alongarà enquiath tresau trimèstre der an 2019 a causa de que s’an de coordinar es òbres damb era atencion jornalièra as usatgèrs.

Fin finau, Carlos Barrera, se hec referéncia ara residéncia geriatrica Sant Joan de Les e ath nau modèl de Pompièrs e Emergéncies dera Val d’Aran. En çò que tanh ara naua residéncia geriatrica, eth sindic d’Aran a explicat qu’es òbres ja an començat e que se manten er acòrd damb eth govèrn dera Generalitat qu’era residéncia geriatrica sigue consorciada ath 50% damb era Generalitat. En çò que tanh ath nau modèl d’emergéncies, eth sindic d’Aran didec que se nomentarà un coordinador der operatiu des estructures entre Pompièrs dera Generalitat e Pompièrs d’Aran entà que a compdar deth mes d’octobre eth nau modèl ja sigue efectiu ena Val d’Aran.

Eth sindic d’Aran a arrebrembat qu’eth pròplèu 17 d’octobre se celebrarà era Comission Bilaterau entre eth Govèrn dera Generalitat e eth Conselh Generau d’Aran a on se tractaràn toti aguesti ahèrs.