Era Generalitat arreconeish a Tòn Cónsul e eth Club Curling Val d’Aran entre es melhors esportistes deth 2017 en Naut Pirenèu e Aran

Anna Esteve deth Club CEVA melhor promesa femenina en esquí aupin

Vielha, 20 de seteme de 2018.- Era secretaria generau der Espòrt dera Generalitat de Catalonha arreconeishec ager dimèrcles a 75 esportistes deth Naut Pirenèu e Aran qu’obtengueren un èxit destacat pendent 2017 enes sues respectives especialitats en competicions d’àmbit catalan, estatau e internacionau.

Er acte, que se celebrèc en cinèma Ribagorçana de Pont de Suert, siguec presidit peth secretari generau der Espòrt, Gerard Figueras, era conselhèra de Torisme e Desvolopament Economic d’Aran, Anna Díaz, amassa damb era delegada deth Govèrn, Rosa Amorós, e eth baile de Pont de Suert, Josep Antoni Troguet. Tanben participèren eth representant territoriau d’Espòrts, Juan Segura, eth president deth Conselh Comarcau dera Nauta Ribagorça, Josep Lluís Farrero, e eth director generau de Politiques de Montanha e deth Litorau, Albert Alins, entre d’autes autoritats.

Eth patinador aranés Tòn Cónsul recuelhèc dus guerdons pendent er acte, eth prumèr coma esportista destacat en espòrts d’iuèrn e er aute coma melhor esportista joen promesa masculina der an 2017.

Pendent er acte dues equipes deth Club Curling Val d’Aran integradi per Jesús Manero, Héctor Manero, Adrián Manero, Marc Barés, Magdalena Vicente e Paula Escobar, arreceberen eth reconeishement per ascens dera equipa ara prumèra Categoria Nacionau e eth campionat de Catalonha de curling. Ath delà, era esquiaira deth Club CEVA, Anna Esteve tanben siguec arreconeishuda coma melhor promesa femenina en esquí aupin de 2017.

Des 75 guerdons individuaus, 39 corresponen a esportistes masculins e 36, a femenins. Apartien a 20 clubs e entitats, 16 que deth madeish territòri deth Naut Pirineu e Aran, e se ne includissen en 10 disciplines esportiues o federacions.

Er an 2017, 40 d’aguesti esportistes demorèren prumèrs en campionats de Catalonha, 95 heren pòdium en campionats d’Espanha (48 en tot arténher medalhes d’aur), 8 heren pòdiums en campionats deth mon e 2 en campionats europèus.

Entre es esportistes distinguidi tanben i son Kilian Jornet, Pep Fillat, Miquel Travé e Núria Vilarrubla.

Es sies prèmis especiaus as melhors esportistes deth Naut Pirineu e Aran en 2017 an estat es següents:

Miquel Travé – Melhor esportista masculin.

Núria Vilarrubla – Melhor esportista femenina.

Tòn Cónsul – Melhor esportista joen promesa masculina.

Anna Esteve – esportista joena promesafemenina.

Oriol Ruiz – esportista damb autes capacitats masculin.

Almudena Ruiz – esportista damb autes capacitats.

En acte de reconeishement tanben arreceberen era sua distincion auti esportistes aranesi e de clubs dera Val d’Aran, coma Lydia e María Iglesias, Júlia Bargalló, Marta Cester, Pol Salvat, Marta Moreno, Alex París, Ares Capdevila, Martí Alonso, Aina Masip, Eugenia Brotons, Lisa Vallcorba e Andreu Perdices.

A toti es esportistes e equipes premiades se les liurèc ua reproduccion dera litografia der artista Isidre Mercadé, titolada “Castelhèrs e escacs”.