Vielha, 14 de gèr de 2019.- Eth plen deth Conselh Generau d’Aran en session extraordinària a aprovat damb es vòts de toti es grops politics eth padron de crubament dera taxa deth servici de recuelhuda de residus entad an 2019 damb un increment de 161.000 € provenent dera taxa d’abitatges d’emplec toristic.

Eth sindic d’Aran, Carlos Barrera, expliquèc en finalizar eth plen que damb aguest increment d’ingrèssi se poderie estudiar era creacion d’ua naua linha de recuelhuda de residus ena Val d’Aran entà poder garantir era recuelhuda selectiva qu’ei era qu’en aguesti moments distorsione era efectivitat deth servici. Barrera, a ahijut, qu’era nòrma europèa de gestion de residus cada viatge ei mès rigorosa donques que somet qu’en an 2020 eth reciclatge a d’èster deth 60% e toti es ciutadans mos cau mentalizar qu’era solucion passe pera reeducación e era concienciacion des usatgèrs.

Pera sua part Francés Boya, conselhèr pòrtavotz d’Unitat d’Aran, a explicat qu’eth sòn grop a votat en favor deth padron de crubament de recuelhuda de residus donques qu’ei just qu’es abitatges d’emplec toristic paguen aguest increment e qu’eth servici de recuelhuda de residus foncione corrèctaments.

Per d’auta part, eth sindic d’Aran, Carlos Barrera, a anonciat pendent eth plen qu’eth pròplèu dia 17 de gèr, eth conselhèr de Trabalh e Ahèrs Sociaus e Familhes dera Generalitat, Chakir El Homrani, visitarà era Val d’Aran entà formalizar eth convèni de cofinanciacion de 30 places dera naua residéncia geriatrica de Sant Joan de Les damb eth Conselh Generau d’Aran.

Eth Conselh Generau d’Aran execute es òbres de bastiment dera naua residéncia geriatrica qu’a un pressupòst de 2.499.988,08 € finançat ena sua totalitat peth Conselh Generau d’Aran.

Era residéncia Sant Joan de Les compdarà damb 60 places que 30 ne seràn de residéncia assistida publica e 30 privades, ath delà de 20 places mès de residéncia de dia.

Eth sindic d’Aran, a manifestat qu’era naua residéncia resolverà eth problèma estructurau e de servicis mès grèu que sofrís era Val d’Aran en aguest moment, pr’amor que permeterà acabar damb era lista de demora actuau de 44 persones, ath delà de solucionar era situacion des aranesi qu’actuauments se tròben enes residéncies de Pont de Suert e de Esterri.