Vielha, 22 de hereuèr de 2019.- Torisme Val d’Aran participe un an mès pendent tota era dimenjada ena Hèira Internacionau de Torisme Navartur 2019 en tot promòir era aufèrta toristica dera Val d’Aran ena hèira qu’est an passat arrecebec mès de 43.000 visitants.

Era Hèira Internacionau de Torisme Navartur, ena sua 14au edicion e eth 2au Congrès Internacionau de Torisme Gastronomic, amasse a mès de 500 professionaus procedenti des desparières comunitats d’Espanha e de 12 païsi, en tot plaçar-se coma era hèira de referéncia entath sector en Nòrd d’Espanha.

Eth 2au Congrès Internacionau de Torisme Gastronomic ei un espaci entà conéisher d’apròp es experiéncies mès innovadores a nivèu internacionau ena industria deth torisme gastronomic.

Eth país convidat en Navartur 2019 ei Japon, país qu’eth darrèr mes de seteme era conselhèra de Torisme d’Aran, Anna Díaz, amassa damb eth director comerciau de Baqueira Beret, Xavier Ubeira, presentèren era campanha dera sason d’iuèrn ena Val d’Aran as mès importants operadors toristics japonesi que Rakuten Travel, Miki Tourist, que trabalhe damb sies enterpreses minoristes mès distribuïdes per Japon, e representantes dera revista Globe-trotters Magazine.