Er acòrd, qu’aurà ua durada de cinc ans a er objectiu qu’er Aran dispòse des recorsi de besonh entà auer autonomia de gestion entà desvolopar es sues foncions

Eth Govèrn dera Generalitat tanben a aprovat un paquet de mesures entath foment e er impuls dera coneishença e emplec sociau der aranés

Vielha, 11 de març de 2019.- Eth Govèrn dera Generalitat qu’a celebrat aué era amassada deth conselh executiu ena sedença deth Conselh Generau d’Aran, a aprovat eth nau modèl de finançament deth Conselh Generau d’Aran. Er objectiu ei qu’era Val d’Aran dispòse des recorsi de besonh entà auer autonomia de gestion e auançar en sòn autogovèrn. Er acòrd aurà ua durada de cinc ans.

Er executiu celebrat aguest deluns en Aran, entre d’auti ahèrs, a ratificat es acòrds dera darrèra Comission Bilaterau Govèrn dera Generalitat-Conselh Generau d’Aran, sus es ahèrs depenenti deth departament de Territòri e Sostenibilitat a compdar dera aprobacion per part der executiu e dera posteriora publicacion en DOGC d’un traspàs de 102.500 € annaus destinadi a accions de conservacion des espacis naturaus protegidi ena Val d’Aran (Hilat Natura 2000 e PEIN) e entà ampliar es mejans personaus entà amiar-les a tèrme. Tanben a demorat aprovat eth traspàs dera Helisuperficie dera Boca sud deth Tunèl de Vielha. Damb eth traspàs va associada ua dotacion economica de 6.000 € annaus entà despenes de conservación, apariament e manteniment.

Eth Govèrn tanben a aprovat er acòrd de cofinanciacion dera naua residéncia geriatrica Sant Joan de Baish Aran. Eth departament de Trabalh, Ahèrs Sociaus e Familhes assumís eth finançament de 30 places residenciaus e 10 d’atencion de dia, ath que destinarà 452.000 € annaus.

Ei previst qu’es òbres de bastiment dera naua residéncia finançades peth Conselh Generau d’Aran damb un impòrt de mès de 2.000.000 € finalizen enes darrèri mesi de 2019. Era prevision ei qu’era residéncia comencé a foncionar a prumèrs der an 2020. Eth sindic d’Aran, Carlos Barrera, expliquèc qu’”aguest acòrd ei estrategic entad Aran e da compliment ara vision deth Govèrn d’Aran en çò que tanh ath principi de reequilibri territoriau deth nòste país”.

Pendent era amassada deth conselh executiu celebrat en Conselh Generau d’Aran tanben s’an aprovat es bases d’un nau modèl de finançament entad Aran per un periòde de 5 ans. Iniciauments s’auie prepausat un periòde de quate ans de vigéncia, mès non a estat possible aprovà’c en tot auer en compde qu’actuauments eth Govèrn dera Generalitat se tròbe en prorròga pressupostària des der an 2018. Un des aspèctes mès destacables d’aguest acòrd ei era aplicacion d’un increment deth 10% sus eth conjunt de traspassi artenhudi peth Conselh Generau d’Aran en periòde 1991-2018, que serà repercutit en quate anualitats a compdar der an 2020. Era part importanta de cadua d’aguestes anualitats ei que s’incorpòren ath finançament globau der an següent, e que per tant demorarà subjècte ara actualizacion des competéncies. S’actualizarà damb un indèx restacat ara evolucion deth finançament dera Generalitat. En definitiva, er actuau pressupòst deth Conselh Generau d’Aran, de 23.144.436 €, se pòt veir ampliat ara fin d’aguest periòde enquia 29 milions d’èuros.

Totes es incorporacions de naui traspassi o ampliaments economics des actuaus s’incorporaràn coma major finançament. Per tant, era prevision de disposar de 29 milions d’èuros se pòt veir incrementada pera evolucion de naues negociacions de traspassi.

En tot avalorar era situacion de prorròga pressupostària dera Generalitat e era excepcionalitat des sues finances, aguest acòrd permet ath Conselh Generau d’Aran ua planificacion e aumentacion dera sua despensa en aqueri airaus estrategics depenenti deth Govèrn aranés.

Eth conselh executiu deth Govèrn dera Generalitat tanben a aprovat un paquet de mesures restacades damb eth foment e er impuls dera coneishença e er emplec sociau der aranés. Entre eres, eth foment der emplec des bibliotèques en Aran e era coneishença dera literatura e cultura aranesa en Catalonha, un plan entà fomentar er aranés a trauès deth IOC (Institut Obert de Catalonha), un plan entara melhora dera preséncia der aranés en airau dera salut, e er impuls der emplec der aranés enes webs dera Generalitat.

Fin finau, eth Govèrn a aprovat era modificacion dera Lei der Espòrt de Catalonha entà crear e arreconéisher es federacions esportiues araneses.

Eth sindic d’Aran, Carlos Barrera, a mantengut ua amassada damb eth president Quim Torra e era conselhèra dera Presidéncia, Elsa Artadi en Conselh Generau d’Aran, a on dempús dera amassada, eth president Quim Torra a liejut ua declaracion institucionau qu’a destacat qu’“eth Parlament de Catalonha arreconeish eth dret deth pòble aranés a decidir eth sòn futur” e a assegurat qu'”ei atau coma era libertat e era democracia se daurissen camin en sègle XXI “.