Es exemplars sigueren posterioraments liberadi en desparièrs arrius dera Val d’Aran

Vielha, 15 de març de 2019.- Es Agents de Medi Naturau deth Conselh Generau d’Aran rescatèren mejançant era tecniciana de pesca electrica 544 exemplars de cabilat e 235 trueites en arriu Garona ath sòn pas pera poblacion de Bossòst.

Es captures se produsiren motivades per trabalhs de mantenença e melhora en canau d’aigua dera centrau idroelectrica de Bossòst que s’auien detectat fugues qu’afectauen as òrts des environs.

Es cabilats e es trueites sigueren liberadi posterioraments en desparièrs arrius dera Val d’Aran.

Ua espècia endèmica des Pirenèus, en perilh d’extincion

Eth cabilat o “cullereta” (Cottus hispaniolensis) ei un petit peish qu’aucupe arrius e torrents de nauta montanha, a on conviu damb era trueita comuna (Salmo trutta). Ei ua espècia endèmica dera vessanta nòrd des Pirenèus e, mès en concrèt, dera conca dera Garona, en tot includir era Val d’Aran, a on actuauments se trape extrèmaments menaçada a causa deth baish numerò d’individus e ar isolament respècte ara rèsta de poblacions dera conca. Sonque ei present en uns pòqui trams, damb densitats fòrça baishes.

Eth cabilat aucupe preferentaments trams d’aigües oxigenades, fòrt corrent e cèrta turbulència, e substrat peiregós. S’alimente, sustot, d’invertebrats aquatics, e ocasionauments tanben d’auti animalons, en tot includir es alevins dera trueita. Ei un animau que non se dèishe veir facilaments, donques qu’ei actiu pendent era net, deth temps que pendent eth dia acostume a demorar quiet en bèth lòc deth hons.

Eth conselhèr d’Agricultura, Ramaderia e Medi Naturau d’Aran, José Enrique Arró, expliquèc que cada viatge que s’amien a tèrme accions de mantenença o autes accions enes arrius dera Val d’Aran es agents de Medi Naturau realizen aguestes captures entà preservar es exemplars d’espècies coma eth Cabilat, espècia autoctòna protegida e extrèmaments menaçada, que se vedec fòrça redusida arraïtz des aiguats der an 2013 ena Val d’Aran.