Vielha, 29 de març de 2019.- Era Corporacion Catalana de Mejans Audiovisuaus (CCMA) e eth Conselh Generau d’Aran an signat un convèni de collaboracion damb er objectiu d’incrementar es contenguts en aranés enes mejans dera CCMA.

Er acòrd de collaboracion ac signaràn eth proplèu 8 d’abriu Núria Llorach, vice-presidenta dera CCMA e eth sindic d’Aran, Carlos Barrera.

Eth convèni prepausa ua seria d’accions dirigides a refortilhar era preséncia de notícies dera Val d’Aran enes arròdes informatives en aranés deth 3/24; promòir eth doblatge de programacion infantila en aranés; impulsar era preséncia dera Val d’Aran en programes d’entreteniment e de caractèr divulgatiu en prime time de Tv3; e era creacion d’espacis web especifics en aranés enes webs ccma.cat e 324.cat. En aguest sens, eth portau ccma.cat arrecuelherie toti es contenguts des mejans de ràdio e television dera CCMA en aranés; e qu’eth portau 324.cat incorpòre er aranés enes informacions referides especificaments ara Val d’Aran.

Eth Conselh Generau d’Aran a trauès dera sua unitat d’assessorament lingüistic sostierà era correccion e traduccion de tèxtes ar aranés.

Er acòrd, qu’aurà ua durada de 2 ans, non compòrte contraprestación economica entre es parts, en tot demorar obligada cadua a finançar respectivaments era execucion des activitats qu’agen d’amiar-se a tèrme.

Eth convèni ei eth resultat des trabalhs dera comission mixta entre era entitat publica audiovisuau e eth Conselh Generau d’Aran damb er objectiu de fomentar er emplec der aranés en Tv3 e Catalonha Ràdio establida eth darrèr mes de noveme.

Actuauments, era programacion de Tv3 e Catalunya Ràdio aufrís de forma establa contenguts informatius en aranés: ròdes deth 3/24 de deluns a diuendres e ua edicion setmanau d’eth “TN Comarques Val d’Aran”. En Catalunya Ràdio, “Eth Maitin d’Aran” aufrís informacion e format magazine de deluns a diuendres, de 8 a 9 deth maitin, per Catalonha Informacion, en desconnexion entara Val d’Aran; ath delà deth blòc de “Catalonha Informacion” en aranés de deluns a diuendres de 12.00 a 13.00 ores.