Vielha, 5 d’abriu de 2019.- Eth Govèrn d’Aran destine 4.356 € entara aplicacion der Observatòri Socioeconomic d’Aran dera pagina web deth Conselh Generau d’Aran “Val d’Aran en chifres”, desvolopada pera enterpresa Cylstat SL.
Aguesta ei ua aplicacion disponibla ena web corporativa deth Conselh Generau d’Aran concebuda entara consulta e analisi d’indicadors de donades socioeconomiques coma: Donades Demografiques, deth Mercat de Trabalh, d’Activitat Economica, e Pressupòsti Municipaus.
Era aplicacion permet consultar es multiples territòris der Aran e desparièrs periòdes de temps.
Aguesta solucion intègre desparières donades estadistiques actualizades entà conéisher es chifres basiques deth conjunt dera Val d’Aran e es municipis damb difusion visuau e interactiva. Es donades son disponibles en taules e nombres, grafics, mapes e piramidas de poblacion, entà ua comprenença immediata deth territòri.
Es resultats se pòden obtier a trauès de:
Taules multidimensionaus.
Grafics d’evolucion temporau interactius.
Piramidas de poblacion interactives.
Mapes tematics interactius.
Enes airaus de: Territòri e Miei Ambient, Coesion Sociau, Economia e Competitivitat, e Imatge e Torisme.
Tota era informacion ei reutilizable e es grafics e mapes se pòden descargar en formats grafics e vectoriaus; es donades que conformen es mapes e grafics se pòden visualizar en manèra taula e descargar en format xls e csv.
Totes es donades provien de hònts oficiaus e s’actualizen de manèra contunhada.
Er accès as donades dera Administracion garantís era transparéncia e eficiéncia ena administracion e era igualtat d’oportunitats, participacion ciutadana e creacion de riquesa entre ciutadans e enterpreses.
Er article 67.3 dera Lei d’Aran preve que “Eth Conselh Generau d’Aran a de crear er Observatòri Socioeconomic d’Aran, damb es objectius, entre auti, d’estudiar, actualizar, gerir e prepausar mesures e accions as administracions publiques e ath conjunt dera societat aranesa en benefici der interès generau. Era composicion, era estructura, es foncions e era organizacion der Observatòri s’establissen per reglament”.
Info: http://portalestadistico.com/municipioencifras/?pn=conselharan&pc=MIF00