Vielha, 18 d’abriu de 2019.- Eth Conselh Generau d’Aran a trauès deth sòn departament de Cultura e Politica Lingüistica publique naues òbres en tot coïncidir damb era celebracion de Sant Jòrdi.
Era prumèra des publicacions ei “Bestiauuu! Amàs poetic de bèsties, bestiòtes e bestieses”, de Xavi Gutiérrez Riu damb illustracions de Ricard Novell, qu’a compdat damb era coordinacion e revision de Manuela Ané e Verònica Barès.
Aguest libre de poèmes a estat possible gràcies a ua ajuda concedida peth Centre d’Art e Natura (CAN) laguens un programa d’escambi damb eth Tyrone Guthrie Centre de Annaghmakerring dera Republica d’Irlanda.
Coma ditz er autor, “donques qu’auem tantes bèsties e tan apròp de casa, mos calie profitar er entorn naturau tan fantastic entà hèr a conéisher era nòsta fauna, era gròssa e era petita, entà qu’era mainadèra aprenen a respectar-les pr’amor que cada bèstia a ua foncion en aguest mon”.
Eth libre, dirigit a toti es publics, includís un poèma entà cadua des bèsties acompanhades dera sua illustracion e eth vocabulari restacat. Bestiauuu!, que se poderà crompar en Sant Jòrdi, se repartirà gratuïtaments enes escòles dera Val d’Aran.
Era dusau publicacion ei “Era revolucion verticau o perqué es umans caminen dreti”, de Ngugi Wa Thiong’o, editat per Pagès editors damb illustracions d’Agustín Comotto qu’a estat arrevirat ar aranés per Jordi Suïls.
“Era revolucion verticau”, ei ua faula africana d’estil classic qu’a estat arrevirada en mès de 80 lengües de tot eth mon. Eth conde explique era formacion deth còs uman coma ua discussion entre es sues parts, e mos rebrembe que “toti èm un, e qu’ena nòsta unitat auem eth poder de transformar er avier que demoram entà nosati madeishi”.
Eth Conselh Generau d’Aran, a aquerit 300 exemplars dera òbra que tanben se repartiràn enes escòles dera Val d’Aran. Des deth departament de Cultura e Politica Lingüistica an dat supòrt ara edicion.
Fin finau, arrebrembar qu’enguan se commemòren es 100 ans dera mòrt deth poèta Mn. Jusèp Condò e Sambeat. Eth dia de Sant Jordi aurà lòc era conferéncia: “Mission complida”, a cargue de Mossen Amiell, eth dia 23 d’abriu tàs 7 dera tarde en Conselh Generau d’Aran. Des deth Departament de Cultura e Lengua s’a confeccionat un quadèrn didactic damb polides illustracions entà dar a conéisher a Condò enes escòles.
