Vielha, 29 d’abriu de 2019.- Eth Conselh Generau d’Aran a celebrat aué eth darrèr plen ordinari d’aguesta legislatura abantes des eleccions deth pròplèu 26 de mai.

Entre d’auti ahèrs, eth plen deth Conselh Generau a aprovat damb es vòts de CDA-PNA e es abstencions d’UA e deth PRAG, er inici der expedient de modificacion deth contracte mixte de Gestion integrau dera recuelhuda e evacuacion de residus dera Val entà melhorar era sua efectivitat.

Aguesta modificacion comportarà era creacion d’ua linha especifica entara recuelhuda selectiva. En concors iniciau aguesta recuelhuda ère prevista damb ua frequéncia qu’era evolucion en increment dera recuelhuda selectiva a hèt evident qu’ère insufisenta. Ei per açò qu’aguesta naua linha compdarà damb 301 dies de servici ar an.

Era abstencion dera oposicion se compren coma un vòt de confidança e un desir compartit damb toti es membres deth plen qu’aguesta sigue era solucion entà ua major qualitat ena prestacion deth servici, e atau evitar es desbordaments produsidi enes punts de recuelhuda dera fraccion de recuelhuda selectiva, sustot de carton, veire e plastic.

En çò que tanh ara legislatura, eth sindic d’Aran, Carlos Barrera, a soslinhat qu’aguesta legislatura a estat fòrça complicada politicaments per afrontament entre eth govèrn espanhòu e eth dera Generalitat damb era aplicacion deth 155. En aguest sens, Carlos Barrera, soslinhèc qu’eth Conselh Generau d’Aran a agut era capitada de poder mantier era neutralitat deuant aguesta situacion en tot deishar era maximala institucion aranesa ath marge, en tot priorizar aguesta neutralitat tà mantier eth sentit de Govèrn territoriau deth Conselh Generau, qu’a d’èster considerat e respectat tanben per toti es vesins d’Aran.

En çò que tanh as darrèri quate ans, eth sindic d’Aran, destaquèc er auanç en tres aspèctes concrèts.

Eth prumèr, era naua realitat dera Residéncia Geriatrica de Sant Joan deth Baish Aran que se bastís en Les, damb 65 places, 30 des quaus finançades pera Generalitat, e 20 places de residéncia de dia, que 10 tanben son finançades pera Generalitat de Catalonha, e qu’ei un pas fòrça important entath benéster aranés.

Eth dusau, era negociacion deth nau finançament d’Aran, que s’a artenhut en ua situacion complicada des finances dera Generalitat. Eth modèl, que serà valid entàs pròplèus quate ans, harà qu’eth pressupòst deth Conselh Generau d’Aran passe des 23.400.000 € actuaus, en un pressupòst ath torn de 30.000.000 €, sense incorporar en aguesta prevision cap des traspassi qu’en aguesti moments se negòcien.

En tresau lòc, er ampliament deth finançament dera estructura deth Servici Integrau de Pompièrs e Emergéncies d’Aran, qu’a de representar era fin deth sòn desplegament, previst tanben en 4 ans, damb era consolidacion de 44 lòcs de trabalh e un pressupòst superior as 2 milions d’èuros.

Fin finau, Carlos Barrera, a anonciat qu’eth pròplèu 6 de mai ei prevista ua naua amassada dera Comission Bilaterau entre eth Conselh Generau d’Aran e eth Govèrn dera Generalitat, a on s’a de signar eth document deth desplegament deth Servici Integrau de Pompièrs e Emergéncies.

Entath sindic d’Aran, Carlos Barrera, aguesti son tres aspèctes a on s’a dat un pas fòrça important en sens dera consolidacion des estructures deth nòste país que dan un balanç força positiu d’aguesta legislatura.