Vielha, 20 de mai de 2019.- Aué dia 20 de mai de 2019, eth sindic d’Aran, Carlos Barrera, a enviat un escrit ath director generau de Politiques Ambientaus e Medi Naturau dera Generalitat de Catalonha, Ferran Miralles, damb er ampliament dera informacion sus es darrèri atacs protagonizadi per os Goiat ena Val d’Aran, ath temps que tanben li a demanat que constate deuant era Administracion der Estat Francés era veracitat e es circonstàncies en que s’an produsit es atacs d’aguest exemplar aumens en tres granges.

Des deth Conselh Generau d’Aran tanben s’a hèt era sollicitud entara convocatòria d’ua amassada tecnica d’expèrts, tau coma determine eth Protocòl d’Intervencion damb Ossi en Pirenèu signat eth darrèr mes de noveme de 2018, entà determinar s’eth nivèu 2 d’aguest protocòl que mèrque es mesures entà sajar de modificar eth comportament der os Goiat se pòt dar per ramplit.

En tot auer en compde que dempús des atacs produsidi en Aran, s’apliquen es mesures de condicionament aversiu entà sajar de modificar eth sòn comportament damb eth resultat de blocatge ena trajectòria de Goiat en direccion entà ramats existents, damb era conviccion per part des Agents de Miei Naturau qu’aumens dus còps s’an pogut evitar es atacs der os.