Era conselhèra de Torisme en foncions Anna Díaz tanben renóncie ara acta e se reincorporará coma personau laborau deth Conselh Generau d’Aran

Rosa Mª Salgueiro serà conselhèra per Castièro e César Ruíz Canela pòrtavotz de CDA en Conselh Generau

Vielha, 7 de junh de 2019.- Eth sindic d’Aran en foncions, Carlos Barrera, a anonciat en ròda de premsa qu’a renonciat ara acta de conselhèr elegit deth Conselh Generau d’Aran e qu’abandone era prumèra linha politica dempús de vint ans coma sindic d’Aran.

Carlos Barrera siguec escuelhut sindic per prumèr còp en 1995 e aucupèc eth cargue en ua prumèra estapa enquiar an 2007. En an 2011 tornèc a èster escuelhut sindic d’Aran.

Barrera qu’a hèt balanç des dues estapes deuant dera maximala institucion aranesa, qualifiquèc era prumèra de normau en çò que tanh ara situacion politica. Per contra a definit era dusau estapa coma “extrèmaments complicada” a causa deth contèxt politic que viu Catalonha.

En aguest sens eth sindic d’Aran en foncions a soslinhat qu’enes darrèri ans s’a artenhut “preservar era neutralitat deth Conselh Generau d’Aran entre eth Govèrn dera Generalitat e eth Govèrn espanhòu, encara que non a estat facil”.

Barrera tanben a manifestat qu’era situacion politica en Catalonha e era deth Govèrn dera Generalitat en particular, damb es pressupòsti prorogadi des der an 2017, non a permetut desvolopar damb plenitud era Lei d’Aran. Totun, a metut en valor eth nau acòrd de finançament entà Aran assolit enguan damb era Generalitat que permeterà “dar estabilitat ath Conselh Generau d’Aran”.

Pendent era ròda de premsa ena qu’a estat acompanhat peth vicesindic d’Aran en foncions, César Ruíz Canela e per Anna Díaz, Carlos Barrera a defenut qu’era prioritat absoluta deth sòn Govèrn a estat eth benéster des persones e que s’a trabalhat en reequilibri territoriau der Aran. Coma exemple a nomentat eth bastiment dera residéncia geriatrica de Sant Joan deth Baish Aran e eth nau modèl de gestion d’Emergéncies en Aran.

A títol personau Barrera a demanat ath que serà nau sindic d’Aran, Paco Boya, as naui conselhèrs e ath pòble aranés que non veiguen ath Govèrn dera Generalitat coma “un enemic” donques qu’era reconeishença dera singularitat d’Aran emana deth Parlament de Catalonha e a ahijut que hè’c serie “un gran error estrategic”.

Fin finau, Carlos Barrera a mostrat eth sòn “arregraïment entath pòble aranés donques qu’eth major aunor ei auer estat sindic pendent 20 ans, as companhs de formacion politica e ara familha peth supòrt pendent toti aguesti ans”.