Era Comission dèishe en suspens era aprobacion d’ua naua bassa d’innivacion artificiau entà Baqueira enquiara constitucion deth nau ajuntament de Naut Aran dempús des eleccions municipaus

Vielha, 11 de junh de 2019.- Era Comission Territoriau d’Urbanisme d’Aran deishèc ager en suspens era aprobacion d’ua naua bassa d’innivacion artificiau entà Baqueira e era ratificacion d’un plan urbanistic entà 27 naui abitatges destinadi a dusaus residéncies en Bagergue.

Es expedients tornaràn a someter-se ara aprobacion dera Comission d’Urbanisme dera Val d’Aran en ua naua session prevista entath pròplèu mes de junhsèga.

En plan entà naui abitatges en Bagergue, era comission reclamèc concretar quina ei era superfícia a on era inclinación deth terren supère eth vint per cent. Cossent damb eth Plan Director Urbanistic dera Val d’Aran, aguesti espacis en fòrt arribent non son boni entà edificacions e sonque pòden destinar-se en zònes verdes.

Era comission aprovèc quate projèctes de Baqueira entà renauir un des sòns  telecagires, concrètaments era substitucion deth telecagira dera Mina ena zòna d’Argulls, damb un recorregut de 1,5 quilomètres, era reforma de restaurants enes còtes 1.500 e 2.200 en tot bastir ua naua terrassa, e entà ampliar un magasèm destinat a talhèr plaçat ena còta 1800.

Ena session tanben s’aprovèc era modificacion des Nòrmes Subsidiàries e Complementàries en airau de Bossòst entara admission d’activitat de camping en solèr non urbanizable.

Fin finau, eth secretari d’Abitat Urban e Territòri dera Generalitat, Agustí Serra e eth sindic d’Aran en foncions, Carlos Barrera, arregraïren era collaboracion d’ambdues institucions en desvolopament deth Burèu Tecnic d’Urbanisme deth Conselh Generau d’Aran e enes acòrds artenhudi en aguesti ans en çò que tanh ara regulacion dera preservacion e recuperacion des bòrdes e cabanes en solèr non urbanizable ena Val d’Aran damb era collaboracion des ajuntaments aranesi.