Eth sindic d’Aran, Carlos Barrera se da comiat des aranesi en tot arregraïr era confiança dempús de 20 ans deuant dera maximala institucion aranesa

Era conselhèra Meritxell Budó, qu’a co-presidit es actes de celebracion dera Hèsta d’Aran a dat comiat ar actuau sindic d’Aran, Carlos Barrera, e a dat era benvenguda ath nau sindic, Paco Boya

Vielha, 17 de junh de 2019.- Era Val d’Aran a viscut un an mès es actes de celebracion dera Hèsta d’Aran, que commemòre era restitucion deth Conselh Generau d’Aran e era recuperacion des sòns drets e privilègis.

Eth Mgfc. sindic d’Aran en foncions, Carlos Barrera e era Hble. Conselhèra dera Presidéncia e pòrtavotz deth Govèrn, Meritxell Budó, an presidit era celebracion dera Hèsta d’Aran.

Eth 17 de junh de 1991 se celebrèren es prumères eleccions ath Conselh Generau d’Aran. D’acòrd damb çò qu’establie er article 11 dera Lei 16/1990. Aran se dividís en sies circonscripcions, que se corresponen damb es sòns terçons istorics.

Eth nombre de conselhèrs e conselhères a escuélher en cadun des terçons ei eth següent: Pujòlo: dus membres; Arties e Garòs: dus membres; Castièro: quate membres; Marcatosa: un membre; Lairissa: un membre e Quate Lòcs: tres membres.

En 1313 eth rei Jaime II autregèc as aranesi eth conjunt de privilègis denominadi “Era Querimònia”, veritabla Carta Magna d’Aran, ratificada per toti es reis enquia Fernando VII.

Es actes dera Hèsta d’Aran an començat ena sedença deth Conselh Generau d’Aran damb era recepcion oficiau deth sindic d’Aran a totes es autoritats e convidadi, en tot contunhar damb era desfilada des pendons amiadi pes representants de cada terçón enquiath Santuari dera nòsta Senhora de Mijaran. Entàs 11.00 ores s’a celebrat era missa solemna ena glèisa de Mijaran.

Es actes de celebracion an compdat damb era participacion de toti es conselhèrs e conselhères deth plen deth Conselh Generau d’Aran, des bailes e presidents des Entitats Municipaus Descentralizades dera Val d’Aran. Tanben an participat eth secretari d’Administracions Locaus e de Relacions damb er Aran, Miquel Àngel Escobar; eth secretari generau der Espòrt e era Activitat Fisica, Gerard Figueras; era directora generau dera Administracion Locau, Rosa Vestit; eth director generau de Politiques de Montanha e de Litorau, Albert Alins; e es deputats deth Parlament de Catalonha, Anna Geli e Javier Rivas; entre d’auti.

Meritxell Budó assegurèc qu’era Hèsta d’Aran ei “un simbèu” dera identitat aranesa pr’amor que se celèbre era restitucion deth Conselh Generau d’Aran e era recuperacion der autogovèrn damb era celebracion des prumères eleccions, en 1991. “Recuperèretz era vòsta identitat e auetz lutat de manèra exemplar entà preservar e recuperar eth vòste auviatge culturau e istoric e era vòsta lengua, er aranés”, a arrebrembat era conselhèra.

En aguest sens, Budó a insistit que “er aranés a estat er estrument qu’a canalizat era vòsta volontat d’èster coma pòble. E ei qu’era cultura e era lengua se convertissen en estruments de defensa deuant era intimidación e es atacs. En Catalonha ac sabem plan, especiuaments, en aguesti tempsi convulsadi que viuem”. Per açò, “er Aran constituís laguens Catalonha ua realitat nacionau damb personalitat pròpria e diferenciada, fondamentada en hèt qu’era comunitat aranesa dispòse d’ua lengua e ua  cultura pròpries, comunes e compartides damb eth rèste d’Occitània e, ath madeish temps, d’ua anciana tradicion d’autogovèrn fidèlaments defenuda pes aranesi ath long deth temps”.

Era conselhèra dera Presidéncia a assegurat que per aguest motiu ua des prumères accions que se hec aguesta legislatura siguec dar compliment “a ua demanda istorica deth territòri, en tot includir es relacions damb er Aran laguens es competéncies deth Departament dera Presidéncia, que presidisqui”. Tanben s’an dat passi “decisius” en marc dera comission bilaterau Generalitat-Aran, “en tot arribar a acòrds fòrça importants entath territòri”, coma er acòrd en matèria de finançament d’un nau modèl que permeterà ath territòri disposar d’ua autonomia de gestion entath sòn desvolopament. Ei un acòrd de cinc ans que darà estabilitat ath Conselh e tanben permeterà ara Generalitat de Catalonha ua major planificacion dera despensa”. Aguest modèl preve qu’en an 2023, eth finançament der Aran sigue de 29 milions d’èuros.

Carlos Barrera se da comiat dempús de vint ans coma sindic deth Conselh Generau d’Aran

Carlos Barrera siguec escuelhut sindic d’Aran per prumèr còp en 1995 e aucupèc eth cargue en ua prumèra estapa enquiar an 2007. En an 2011 tornèc a èster escuelhut sindic d’Aran.

Eth sindic d’Aran en foncions, dempús de desirar bona Hèsta d’Aran a toti es assistents expliquèc qu’era situacion sociau e politica en Catalonha e era deth Govèrn dera Generalitat en particular, damb es pressupòsti prorogadi des der an 2017, non a permetut desvolopar damb plenitud era Lei de Aran. Totun, a metut en valor eth nau acòrd de finançament entà Aran assolit enguan damb era Generalitat que permeterà “dar estabilitat ath Conselh Generau d’Aran”.

Carlos Barrera a metut en valor eth trabalh hèt peth Govèrn d’Aran enes airaus sociaus e economics, atau coma enes projèctes co-finançadi pera UE. Barrera a metut coma exemple eth bastiment dera residéncia geriatrica de Sant Joan deth Baish Aran, eth nau modèl de gestion d’Emergéncies en Aran, eth nau finançament, eth bastiment deth dusau quiròfan der Espitau dera Val d’Aran, es prètzhèts de melhora e conservacion des accèssi ar auviatge naturau e culturau dera Val d’Aran, o eth Parcours Cyclable (rota ciclista) entà júnher eth neishement der arriu Garona ena Val d’Aran e era ciutat de Toulouse. Barrera a ahijut que “aguest ei eth legat que deisham entaht nau Govèrn d’Aran e qu’eth benefici d’aguest trabalh ac a de gaudir eth pòble e es ciutadans e ciutadanes deth país”.

Carlos Barrera destaquèc ena sua intervencion qu’“era Generalitat e eth Parlament de Catalonha an comprenut a trauès dera fèrma decision deth dialòg, era singularitat, e era cultura pròpia e deth territòri d’Aran damb eth desvolopament des dues Leis d’Aran qu’an de perméter er autogovèrn der Aran, e remerquèc aht nau Govèrn d’Aran e ath pòble aranés que non veiguen ath Govèrn dera Generalitat coma un enemic donques qu’era reconeishença dera singularitat d’Aran emana deth Parlament de Catalonha”.

Fin finau, Carlos Barrera a arregraït “era dedicacion a toti es conselhèrs e conselhères deth Conselh Generau d’Aran, a toti es bailes d’Aran pera sua collaboracion, a totes es persones qu’a títol individuau an collaborat tanben damb eth Govèrn d’Aran entath desvolopament d’Aran, e a tot eth pòble aranés e ara familha per auer-li permetut era dedicacion en país pendent aguesti ans”.