• Coma toti es ans, er equip entrene ena Val d’Aran pendent lèu ua semana abantes de començar era temporada

• “Ei tot un aunor entà nosati acuélher pendent uns dies equipes coma eth Lleida Esportiu, er Espanyol B o Espanyol femenin, entre d’auti”, afirme eth conselhèr

Eth conselhèr d’Espòrts, Héctor Manero, a arrecebut aguest meddia as tecnics e as jogadors deth Lleida Esportiu ena sedença deth Conselh Generau d’Aran.

Des deth passat diuendres, 2 d’agost, er equip ei ena Val d’Aran realizant eth sòn dejà tradicionau stage d’ostiu, que finalize dijaus, dia 8.

Uns dies pendent es quaus entrenen en camp de fotbòl de Garòs, en Naut Aran, mès tanben profiten entà exercitar-se en tot conéisher eth nòste país mejançant excursions coma era que realizèren ager ar Estanh de Besiberri.

Eth Lleida Esportiu a obsequiat ath conselhèr Manero damb ua samarreta signada per toti es jogadors, e eth Conselh les a aufrit tanben a toti eri un petit present.

Aguestes estades esportiues, assegure eth conselhèr d’Espòrts, “servissen entà visibilizar era Val d’Aran coma era destinacion d’espòrts qu’ei e ei tot un aunor entà nosati acuélher pendent uns dies equipes coma eth Lleida Esportiu, er Espanyol B o Espanyol femenin, entre d’auti”.