• Eth passat dijaus auec lòc ua amassada entre eth sindic d’Aran, Francés Boya, era conselhèra de Coneishement, Angelina Cases e eth director de Servicis Territoriaus de Lhèida, Carles Vega, acompanhat der inspector Joan Solsona, entà tractar sus diuèrsi ahèrs relacionadi damb des besonhs der ensenhament en Aran

• Quauquuns des ahèrs tractadi an estat eth besonh qu’er aranés sigue contemplat coma un requisit obligatòri en procès de seleccion e oposicions deth professorat en Aran, es possibles accions tà potenciar dera Escòla d’Ostalaria de Les e era reclamacion tà revertir es retalhades de professorat en Aran

Eth sindic d’Aran, Francés Boya, e era conselhèra de Coneishement, Angelina Cases, s’amassèren damb eth director de Servicis Territoriaus de Lhèida, Carles Vega, e damb er inspector Joan Solsona entà tractar ahèrs relacionadi damb er ensenhament en Aran.

Dempús de constatar qu’er aranés non ei present enes merits des oposicions des mèstres qu’auran d’exercir en Aran, eth sindic profitèc aguesta amassada tà demanar que s’inclodisque ua addenda en decret 161/2002 tà qu’era nòsta lengua pròpria sigue un requisit obligatòri en accés as places de professorat ena Val d’Aran.

Atau madeish, entre es ahèrs tractadi, s’acordèc estudiar qu’era Val d’Aran pogue esdevier ua zòna educativa especiau, qu’aurie de facilitar resòlver es problematiques especifiques deth territòri, coma designacion de  professorat, era optimizacion des servicis de minjador e transpòrt o era especifictat dera Escòla Aranesa.

Era amassada tanben servic entà acordar accions tà potenciar era Escòla d’Ostalaria de Les, coma pòt èster ampliar es cicles formatius qu’aufrís. Per un aute costat eth sindic reclamèc ath director que se revertisquen es retalhades en professorat d’Aran, pr’amor qu’an un impacte fòrça negatiu enes escolans e enes equips educatius e, tanben, que s’avalòre era dificultat qu’an es Escòles mairaus araneses entà fidelizar ath professorat depenent deth Departament d’Ensenhament.

“Tot e qu’eth Conselh non a competéncies en ensenhament, un des objectius deth nòste govèrn ei implicar-mos entà resòlver es besonhs deth sistèma educatiu aranés” afirme era conselhèra de Coneishement, Angelina Cases, que hig que: “pr’amor d’açò consideram de vitau importància mantier ua relacion dirècta damb eth Departament d’Educacion dera Generalitat”.