• A trauès dera iniciativa presentada peth govèrn deth Conselh Generau, eth plen a aprovat reclamar a Foment, DGT e SCT aguesta restriccion, qu’a coma objectiu garantir era seguretat des usatgèrs d’aguesta carretèra

• Aguestes restriccions se realizarien pendent es diuendres de 17:00 a 24:00 ores, de Benabarre ara termièra francesa, e es dimenges, de 13:00 a 19:00 ores, en sentit contrari pendent es mesi de deseme a març

Eth plen deth Conselh Generau d’Aran a aprovat per unanimitat aué era mocion entà sollicitar ath Ministèri de Foment , ara Direccion Generau de Transit (DGT) e ath Servici Catalan de Transit (SCT) era limitacion deth pas de camions de Benabarre enquiara termièra francesa es dimenjades de deseme a març.

A trauès d’aguesta demana, eth govèrn deth Conselh inste a limitar eth pas de camions articuladi pera N-230 toti es diuendres de 17:00 a 24:00 ores, de Benabarre ara termièra francesa, e toti es dimenges, de 13:00 a 19:00 ores, en sentit contrari.

Aguesta restriccion s’amiarie a tèrme a compdar der 1 de deseme e enquiath 21 de març, en tot coincidir damb era epòca de major transit d’aguesta carretèra, quan es usatgèrs l’empleguen tà arribar enes estacions d’esquí de Baqueira Beret e Boí.

Pendent aguestes dates se produsissen granes coes e dificultats ena floïdessa deth transit, ocasionades pes camions articuladi que circulen lent en trams a on ei extremadament dificil e perilhós realizar quinsevolh adelantament.

“Toti sabem er impacte qu’a ena Val d’Aran eth pas des 500 camions diaris que trauèssen es nòsti pobles e es incomoditats que generen. Mès sustot mos preocupen es problèmes relacionadi damb era seguretat des usatgèrs d’aguesta carretera”, afirme eth sindic d’Aran, Francés Boya. “I a uns dies ath long der an, especiaument es dimenjades qu’ei dubèrta era estacion d’esquí, en que eth pas des camions per aguesti trams tan complicadi collapse eth trafic e a grèus efèctes ena seguretat des conductors”.