• Eth sindic d’Aran, Francés Boya, a presentat aué era conferéncia dera vicepresidenta dera Corporacion “Tara construccion der espaci de comunicacion aranés”, ena que Núria Llorach a anonciat era sua volontat d’impulsar er aranés e fomentar un espaci de comunicacion pròpri en Aran

Eth Conselh Generau d’Aran a acuelhut aguesta tarde era conferéncia “Tara construccion der espaci de comunicacion aranés”, presentada peth sindic d’Aran, Francés Boya, e impartida pera vicepresidenta e presidenta en foncions dera Corporacion Catalana de Mejans Audiovisuaus (CCMA), Núria Llorach.

Pendent era sua intervencion, Llorach a anonciat qu’era Corporacion Catalana de Mieis Audiovisuaus s’a fixat coma objectiu entàs pròplèu ans collaborar damb eth Conselh Generau d’Aran entà contribuir ena estimulacion der usatge sociau der aranés.

“Volem contribuir e collaborar tà arténher ua lengua viua e de prestigi e trabalhar per un sector audiovisuau qu’apòste tanben per entreteniment e pera programacion infantila. Pretenem qu’er aranés melhore era sua preséncia en internet. E volem, en definitiva, contribuir entà que, ena Val d’Aran, se pogue víuer pleament en aranés”, a afirmat era vicepresidenta.

Er objectiu deth Conselh Generau d’Aran e era Corporacion Catalana de Mieis Audiovisuaus ei incrementar eth volum de materiau audiovisuau en aranés, non sonque de productes informatius, senon tanben de programacion d’entreteniment e animacion entara mainadèra, productes qu’ara non s’aufrissen en aranés. Entà crear un espaci de comunicacion pròpri deth territòri, s’a explicat en aguesta conferéncia, ei de besonh fomentar eth sector audiovisuau ena Val d’Aran, en tot promòir projèctes hèts e pensats en aranés.

En darrèr lòc, Llorach a destacat qu’era Corporacion ja a incorporat er aranés e es obligacions que se’n deriven entà TV3 e Catalunya Ràdio en contracte programa “entà que poguen recéber era aportacion pressupostària que se’n derive, qu’ei imprescindible”.

Eth sindic d’Aran manifestaue que “des deth govèrn deth Conselh Generau èm fòrça satisfets pera predisposicion mostrada pera vicepresidenta”, e a hijut que “eth contracte programa, qu’ei eth marc que regís es obligacions e projèctes vinculadi ara CCMA, a d’èster un esturment fonamentau tà definir era implicacion dera Corporacion damb er aranés. De moment, aguest ei eth prumèr còp qu’aguest contracte programa a en compde era nòsta lengua”.