Era Val d’Aran acuelh per prumèr còp era OPA CUP U16

Aguesta pròva internacionau que finalize aué comencèc eth passat dia 11 e i an participat joeni e joenes de 10 païsi entre eri Àustria, Soïssa, Itàlia, França o es Estats Units coma país convidat
Àustria e França an estat es païsi qu’an dominat aguesta pròva damb 10 des 12 pòdiums

Era Val d’Aran a acuelhut pendent es dies 11 e 13 de hereuèr era OPA CUP U16. Ei eth prumèr còp qu’Espanha acuelh aguesta competicion internacionau, a on an participat mès de 10 païsi, entre eri Àustria, Soïssa, Itàlia, França o es Estats Units coma país convidat.

Es dies 11 e 12 de hereuèr aueren lòc era SG OPA Cup U16 e era GS OPA Cup U16, respectivament, e aguest madeish maitin s’a disputat era TEAM EVENT OPA Cup U16.

“Entà nosati acuélher ua competicion coma era OPA CUP U16 ei tot un privilègi pr’amor que da, non sonque a Baqueira Beret senon ath conjunt dera Val d’Aran, ua visibilitat internacionau que repercutís de forma fòrça positiua en territòri”, afirme eth sindic d’Aran, Francés Boya.

Ena categoria femenina dera pròva SG artenhec er aur Victoria Buergler (AUT), seguida per Kim Marschel (GER) e Victoria Olivier (AUT). Pera sua part, ena categoria masculina quedèc en prumèra posicion Agustin Berthet (FR) seguit de Noa Oddo (FR) e Paul Wagner (AUT).

Ena categoria femenina de GS quedèc en prumèra posicion Victoria Olivier (AUT), seguida per Victoria Buergler (AUT) e en tresau lòc Valentina Rings- Wanner (AUT). Des gojats, Dylan Hacquard (FR) artenhec er aur, Lorenzo Salvati (IT) s’emportèc era dusau posicion seguit per Noa Oddo (FR).

En çò que tanh ara TEAM EVENT OPA Cup U16, ena que diferents equips des diuèrsi païsi competien entre eri, a artenhut era victòria eth prumèr equip Italian, format per Maria Sole Antonini, Gregorio Bernardi, Francesca Carolli e Alessandro Bertagnolli.

En aguesta OPA CUP ua des esquiadores espanhòles, June Garitano, a entrat en Top 10 dera classificacion. Pera sua part, er aranés Lluc de Castellarnau, deth CAEI, a quedat ena 33au posicion damb un crono de 2:03.25.

Aguesta corsa a estat organizada pera Reiau Federacion Espanhòla d’Espòrts d’Iuèrn (RFEDI) e Baqueira Beret, damb era collaboracion deth Conselh Generau d’Aran, e eth supòrt des Ajuntaments de Naut Aran e Vielha e Mijaran, era Diputació de Lleida e era Generalitat de Catalunya a traués deth Conselh Catalan der Espòrt.