• Aguesta jornada s’incorpòre laguens der ampli ventalh d’activitats qu’eth govèrn deth Conselh Generau d’Aran a previst entà commemorar eth Dia Internacionau dera Hemna, qu’aurà lòc eth pròplèu 8 de març, e que se presentarà aguesti dies

Eth Conselh Generau d’Aran a acuelhut aué era formacion “Era perspectiva de genre, estrategia entà dessenhar es politiques publiques en sègle XXI”, un collòqui qu’a estat presentat pera vicesindica prumèra e conselhèra d’Igualtat, Salut e Benèster, Maria Vergés.  I an assistit representants deth CGA e alcaldes, alcaldesses e d’auti representants des ajuntaments e EMD d’Aran.

Aguesta activitat anaue dirigida as cargues elèctes e que pretenie informar e formar sus era perspectiva de genre e eth besonh d’implementar politiques especifiques entà previer e actuar contra era violéncia de genre, es desigualtats e discriminacions e dar assisténcia as collectius de hemnes qu’an majors dificultats pera existéncia de desigualtats estructuraus de genre ena societat.

Totun, s’a parlat tanben deth besonh d’incorporar era perspectiva de genre en tota politica o servici public e hè’c des d’un enfocament interseccionau, ei a díder, qu’age en compde totes es desigualtats que poguen èster importants en cada airau especific coma, per exemple, era edat, er origen, era orientacion sexuau, era classa sociau…

Aguesta formacion ei era prumèra accion des actes que s’an previst entara commemoracion ath Dia Internacionau dera Hemna, qu’ei eth pròplèu dimenge 8 de març, e entre es que i aurà un ampli ventalh d’activitats dirigides a totes es persones qu’i volguen participar.