• Un nombre elevat de mashines d’aguest espitau se trapen en situacion d’obsolescéncia pr’amor dera manca d’inversion pendent es darrèri ans e eth govèrn aranés a sollicitat eth supòrt ara Deputacion de Lleida e ara Generalitat de Catalunya entath sòn renauiment

Un des besonhs dera sanitat aranesa ei eth renauiment de diuèrsi des aparelhs medics der Espitau Val d’Aran, pr’amor que quauqui d’eri se trapen dejà en situacion d’obsolescéncia pr’amor dera manca d’inversion que i a auut pendent es darrèri ans.

Totun, pr’amor der elevat còst economic d’aguesti cambis, d’ath torn d’un million d’èuros, eth govèrn deth Conselh Generau d’Aran a sollicitat era collaboracion de d’autes administracions, coma era Deputacion de Lleida e era Generalitat.

Per çò que hè ara Deputacion de Lleida, eth pressupòst tà 2020 d’aguesta institucion inclodís (pr’amor der acòrd entre eth grup d’UA en aguesta institucion e eth govèrn dera Deputacion) ua ajuda economica tad aguest prètzhèt, atau qu’eth Conselh Generau d’Aran compdarà damb un supòrt important tara crompa des equipaments

Atau madeish, tanben s’a sollicitat ara Generalitat de Catalunya ua ajuda en aguest sens, que s’a de materializar a trauès d’un plan de renauiment tecnologica.

Aguest renauiment, segontes afirme era vicesindica prumèra e conselhèra d’Igualtat, Salut e Benèster, Maria Vergés, “ei ua des prioritats qu’auem establides” e hig que “era manca d’inversion en airau sanitari des darrèri ans, provocada per efècte des retalhades amiades a tèrme, a condicionat de forma notabla era gestion en aguest airau, un condicionament qu’ei de besonh revertir urgentament”.

Atau madeish, eth sindic d’Aran, Francés Boya, a declarat que: “gràcies ar acòrd politic damb era Deputacion, poderam hèr aguesta inversion, hèt que demòstre tanben era importància de que Aran compde damb representacion enes institucions de dehòra deth nòste territòri”.