• Pr’amor d’aguesta iniciativa s’emeterà informacion en dirècte de quinsevolh indici d’ossi ena Val d’Aran e permeterà, atau coma indique eth conselhèr de Territòri, Paisatge e Gestion ambientau, guanyar en transparéncia per tot çò que hè referéncia ara gestion der os en Aran

Eth govèrn deth Conselh Generau d’Aran, en tot atier as demanes des associacions ramadères e d’auti sectors d’usatgèrs deth miei naturau deth territòri, implantarà un sistèma d’informacion en dirècte des indicis d’ossi que i age ena Val d’Aran.

Segontes afirme eth conselhèr de Territòri, Paisatge e Gestion ambientau, Francés Bruna, “damb aguest nau sistèma se preten guanhar en transparéncia per tot çò que hè referéncia ara gestion der os en Aran”.

Damb aguesta naua iniciativa, s’aufrirà a totes es persones interessades informacion sus era localizacion des animaus, era data e eth tipe d’indici: peades, lòcs de pas, avistament, atac a bestiar, eca.

Era comunicacion d’aguestes informacions s’amiaràn a tèrme a trauès dera plana web deth Conselh Generau d’Aran, a on s’actualizarà un listat toti es dies laborables e que serà lèu en foncionament.