• Eth sindic d’Aran e era vicesindica an assistit aguest maitin ara Ponéncia Permanenta entre era Generalitat e eth Conselh Generau, qu’a coma objectiu dar suport ara Comission Bilaterau entre es dus govèrns e tractar sus es diuèrsi traspassi e convenis entre andues administracions

Aguest maitin eth sindic d’Aran, Francés Boya, e era vicesindica, Maria Vergés, an assistit en Barcelona ara Ponéncia Permanenta de trabalh en matèria de traspassi e convènis entre era Generalitat de Catalunya e eth Conselh Generau d’Aran, ena qu’an estat presents eth secretari d’Administracions Locaus e de Relacions damb Aran, Miquel Àngel Escobar, era subdirectora generau de Finançament e Sostenibilitat Financera, Montserrat Bassols, era assessora deth Departament de Presidéncia en airau deth mon locau, Nuria Balada, e eth tecnic d’Administracion deth Conselh Generau d’Aran, Enrique Pérez.

Aguesta Ponéncia, cossent damb er acòrd dera Comission Bilaterau qu’auec lòc ena Val d’Aran eth passat 31 de gèr, a coma objectius impulsar eth desplegament dera Lei d’Aran, analizar era realitat de competéncies que s’exercissen des d’Aran e quines son es competéncies a on non i an decrèts de traspassi e estudiar s’ei de besonh o non exigir aguestes naues competéncies. En aguest cas, s’establirie tanben ua priorizacion d’aguestes naues competéncies a transferir que permet era pròpria Lei de Regim Especiau d’Aran.

Segontes a declarat eth sindic d’Aran: “eth govèrn aranés a començat un estudi entà tà aprigondir en diuèrses competéncies qu’exercís eth Conselh Generau d’Aran” e a hijut que “eth Conselh Generau d’Aran priorizarà era gestion des ahèrs relacionadi damb era politica lingüística tà arturar era actuau descoordinacion entre era Direccion Generau de Politica Lingüistica e eth Conselh Generau”.