• Pendent era trobada eth sindic d’Aran e eth president deth COE an tractat diuèrsi ahèrs relacionadi damb era candidatura olimpica Pirenèus-Barcelona 2030, sus era quau eth govèrn aranés presentarà deman ua mocion en Plen deth Conselh Generau d’Aran entà manifestar eth suport ad aguesta candidatura e demanar era inclusion d’Aran coma subsedença organizadora de pròves de nhèu

Eth sindic d’Aran, Francés Boya, s’a amassat aguest maitin en Madrid damb eth president deth Comitè Olimpic Espanhòl (COE), Alejandro Blanco, entà tractar de prumèra man diuèrsi ahèrs relacionadi damb era candidatura Olimpica Pirenèus-Barcelona 2030.

“Aguesti Jòcs Olimpics e Paralimpics d’Iuèrn son de grana importància entara Val d’Aran pr’amor der impacte e repercussion qu’aurien entath desvolopament economic e sociau en nòste territòri”, afirme eth sindic d’Aran, que hig que “es Jòcs Olimpics de 2030 seràn es prumèri d’ua naua etapa aprovada peth Comitè Olimpic Internacionau (COI) e Pirenèus-Barcelona s’aufrís entà experimentar aguest nau format de Jòcs Olimpics capables d’inspirar e transformar era societat, especiaument as joeni e joenes”.

Atau madeish, eth sindic tanben a manifestat que “era importancia d’aguesti Jòcs tanben se trape en qu’an coma basa fonamentau eth respècte ath mèdi ambient, er equilibri territoriau e era luta contra eth despoblament”.

Eth COI dejà a dat lum verda ath projècte Pirenèus-Barcelona e a iniciat ua fasa de dialòg, deishant clar qu’eth territòri e era propòsta complissen damb era sua Agenda 2020 en çò que hè as condicions entà devier sedença des Jòcs Olimpics de 2030.

Pr’amor d’açò, eth govèrn deth Conselh Generau d’Aran presentarà deman en Plen ua mocion entà manifestar eth supòrt dera institucion ara candidatura olimpica der an 2030 entre es territòris de Catalunya e Aragon damb era inclusion d’Aran coma subsedença organizadora des pròves de nhèu, e constituirà ua Taula Aranesa damb es principaus agents representatius deth territòri entà implicar-se en bastiment dera candidatura en clau aranesa.

Damb aguesta mocion, eth Conselh Generau cerque meter-se a disposicion des responsables dera candidatura e harà arribar aguest acòrd ara Deputacion de Lleida, er Ajuntament de Barcelona, era Secretaria Generau der Espòrt, era  Generalitat de Catalunya, eth COE e eth Govèrn Espanhòl.